Gufuu tokkummaa Oromoo buqqisuuf hojjenna

Tibbana wanti tokkummaa Oromoo’tti gufuu ta’uu danda’u mul’atee darbeera.Oromoon yoo tokko ta’uun socho’u bu’aan argamu sirritti waan beekamuuf tokkummaa Oromootti gufuu ta’uuf kan socho’u diina keessaaaafi alaa hedduutu jira.

Adeemsaafi tooftaa diina alaafi keessaa kana beekuudhaan qolachuuf dhaabbachuun dirqama Oromoo hundaa ta’uu qaba.Waan qabatamaan ta’ee darbe hubachuuf mudannoowwan tibbanaa qofa xiinxaluun gahaadha.

Muummichi ministiraa Dr.Abiyyi Ahmad torban darbe keessa miseensoota mana maree bakka bu’oota ummataatiin gaaffilee gara garaa dhiyaataniif ibsaafi deebii bal’aa wayita kennanitti gaaffii dhimma naamusa miidiyaalee irratti dhiyaateef ol’aantummaa seeraa jiddu galeessa gochuudhaan deebiin kennan sirriidha,dogongora tokkollee hin qabu.Dr.Abiyyi wayita dhimma kana irratti deebii kennanitti abbootiin qabeenya miidiyaa lammummaa biyya alaa qaban of eeggannoodhaan akka hojjechuu danda’aniif dhaamsa sirrii ta’e dabarsan.Dirree bal’isuuf obsine nuhubadhaa jedhan.

Diinni keessaa haala mijaawaa eeggachaa jiru battala kanatti riphuudhaan deebii kenname hordofaa ture.Muummchi ministiraa Dr.Abiyyi Ahmad turtii miseensoota mana maree bakka bu’ootaa wajjin taasisan xummuruudhaan waaree booda gara Ruusiyaatti imaluunsaanii oduudhaan miidiyaawwaniin tamsa’e.Dhimmi gara Ruusiyaa imaluu muummicha ministiraa kanumaan dura himamaa ture waan ta’eef diinni keessaa tooftaa qopheeffachaa akka ture tilmaamuun nama hin dhibu.

Warri paaspoortii biyya alaa qabdan yoo nuti rakkootti gallu isini nu dhiiftanii baqattu,nuti biyya biraa hin qabnu, seeraafi naamusa eeguudhaan hojjedhaa jechuun dhaamsa dabarsuun eenyufa’iif dhaamsa darbe akka ta’e kanneen keessa beekan yeoo mijeeffachuun halkan gara waardiyoota Jawaar Mahaammadiif ramadamanitti akka bilbilamu taasisan.

Waardiyoonni Jawaar ammoo kutannoodhaan ejjennoo qaban ibsuudhaan diddaa mul’isan.Tarkaanfiin waardiyoonni Jawaar fudhatan sirriidha,asirratti dogongorri raawwatame tokkollee hin jiru.Inumaatuu fayyadamtummaa Saba Oromootiif namoonni akkanaa kan ejjennoo hin raafamne qaban akka nuuf baay’aataniif waaqa kadhachuun gaariidha.

Battala eegdota/waardiyoota Jawaariif bilbilametti dhimmicha qulqulleessuuf qaamolee gara garaatti akka bilbilame Jawaar ibsa borumtaatti kenneen himeera.Dhugaafi soba ta’uusaa isaanumatu beeka,wayita mudannoon fafeen kun mudatutti waluma bira waan turaniif.

Tarkaanfiin Jawaar jarjarsuudhaan fudhates waanuma eegamudha.Utuu wanti kun anarratti ta’ee maalan godha jechuudhaan of gaafachuun barbaachisaadha.Jawaar ergaa fuula feesbuukii isaarratti dabarseen marfamnee jirra nurraa deemaa yoo deemuu baattan tarkaanfii fudhanna jechuunsaa dogongora qaba jedhee hin yaadu.Mirri jarjarsuu waan jiruuf Jawaar yeroo kanatti fala biraa waan yaaduu danda’e natti hin fakkaatu.Fkf.dhimma kana qondaaltoota walitti dhiyeenya qabutti maalif himuu dhiise jechuun yaadni dhiyaatu jira.

Battala kanatti Qeerroon ergaa Jawaar dabarse argate socho’ee Jawaariif birmachuun isaas waanuma ta’uu qabudha.Qeerroon Oromoo Jawaariif halkan sanaan birmachuunsaa jajamuu qaba!Tarkaanfiin kun akka Oromoon waliif quuqamufi diina walirratti duuluu danda’u mul’isa.

Dhimmi halkan sana mudate qoratamee ummataaf ibsama jedhameera.Qorannoon kun saffisuu qaba.Ergama kana keessatti enyuufa’itu hirmaate?Eenyuun darbaa dabrsaadhaan ajajaman?maalif waan kana halkan raawwachuuf karoorfatan?takka takkaan balballoomfamee Ummatatti himamuu qaba.Kana gochuu kan danda’u ammoo hooggansa amma jirudha.Wanti kun saffisaan qoratamee hin dhiyaatu taanaan gaarii hin ta’u.Hooggansa jijjiiramaatiifis akkuma barame mala baratametu malama.Duurfamuun dura duursuu wayya.

Diinni Oromoo mudannoo kanaan bu’aan argate maali?

Diinni hooggansa Oromoo mudannoo tibbanaa kanaan bu’aa qabatamaa akka argatee gammade hubachuun barbaachisaadha.Gocha diinaa kanaan Tokkummaa Oromoo dagaagaa jirutti qaawwa uumuuf yaaliin qabatamaan taasifameera.Mikaa’uu baatus yaaliin diinaa tuffiidhaan taasifame kun hamma takko diinaaf bu’aa argamsiiseera jechuun ni danda’ama.

Kana malees borumtaa mudannoo kanaatti Naannoo Oromiyaa iddoo baay’eetti Daandiin cufameera.Qeerroon karaa nagaatiin ta’us mormiisaa dhageessiseera.Humni qeerroo guyyoota lamaaf sochii diinagdeerraa dhaabbate diinaaf bu’aa akka ta’etti ilaalamuu qaba.

Mudannoo kana booda dhimmicha gara waldhabdee amantaafi Sabaatti jijjiiruuf yaalii taasifameen lubbuun namoota 67 darbuuniifi iddoowwan adda addaattis qabeenyi mootummaafi dhuunfaa barbadaa’uun diinaaf bu’aa qabatamaan mul’atu akka ta’e haalamuu hin qabu.Diina keenya waan godhu dhabee shira xaxaa ooluuf kan tarreeffame kun hundumatuu bu’aa ol’aanaadha.

Hooggansa Oromoo jalatti wantoonni fokkisaan tibbanaa kun akka raawwataman gochuun duruu Oromoon biyya hoogganuu hin danda’u jechuun ejjennoo qabatan sana dhuguumsuuf akka ta’e hubachuun barbaachisaadha.Diinoota keenya waan kana keessa kan isaan galche Oromoon biyya hoogganuu irra darbee ga’uumsa hooggansa isaa Addunyaatti beeksisusaa akka ta’es qalbeeffachuun barbaachisaadha.

Fuulduratti Oromoo hunda irraa maaltu eegama?

Tokkummaan Saba Oromoo amansiisaa ta’uu qaba!Tokkummaan Oromoo akka sibiilaatti jabaataa akka ta’uufi miccaramus kan hin jallanne akka ta’uuf xiiqiidhaan hojjechuun dirqama Oromoo hundaa ta’uu qaba.

Dhimma tokkummaa Oromoo irratti sababa adda addaa tarreessuudhaan qaawwa uumuuf kanneen carraaqan kamiyyuu balaaleeffatamuu qabu,yoo dogomgoran akka of sirreessan gorsuu qabna,yoo ejjennoodhaan dhufan ammoo akka itti qolannu mijeeffachuudhaan waliin qolachuu danda’uu qabna.Dhimmi tokkummaa saba Oromoo dhimma ijoo Oromoo hundaa ta’ee irratti hojjetamuu qaba.

Diinni keenya jaarraa tokkoofi walakkaa ol Oromoo cunqursuun itti roorrisuu kan danda’e Oromoo qoqqooduudhaan,nutti fakkeessee numa wal nyaachisuudhaan akka ta’e yoomillee dagachuu hin qabnu!

Gaaffiiwwan Oromoo gurguddoon hanga ammaatti deebii hin arganne deebii gahaa akka argataniif Oromoon hunduu yaada tokkoon dhaabbachuu qaba.Waadaa hooggansa ol’aanaadhaan galames obsaan eeguun gamnummaadha.Hooggansa Oromoo amma biyya bulchaa jiru ija shakkiitiin ilaaluunis dhaabbachuu qaba.Hooggansi Oromoo sadarkaa fiixee amma irra jiru irra ga’e deebi’ee Saba Oromoo miidhuuf hojjechuu danda’a jechuun yaaduun tarii miidhama waggoota hedduuf nurra ga’e irraa ka’uun shakkii dhufu ta’uu danda’a waan ta’eef dhimma kanas walitti dhiyaachuudhaan wal hubachiisuun,walgorfachuun dubbii kamiyyuu obsaan ilaaluun barbaachisaadha.Carraa amma arganne kana yoo nu harkaa ba’e deebinee argachuu akka hin dandeenyetti yaaduudhaan hojjechuun dirqama Oromoo hundaa ta’uu qaba!Waan saba guddaa kana gabrummaa jalatti deebisu irraa of eeguudhaan socho’uunis imaanaa Oromoo hundaa ta’ee yoo hojjenne rifaatuun tibbana numudate yeroo gabaabduu keessatti akka badu tilmaamuun rakkisaa hin ta’u.Tolawaaq Waarii waan dubbiftaniif galatoomaa!Horaa bulaa!