Hegereef har’a Biqiltuu dhaabuu qabna!

Finfinnee Waxabajjii 27/2011(Tolawaaq Waarii) Dhimmi biqilqtuu dhaabuu xiyyeeffannoo guddaa argachuu qaba.Waa’een Biqiltuu dhaabuu bara jijjiirraa jaarraa amma keessa jirru kana irraa eegalee akka xiyyeeffannoo argatuuf carraaqqiin taasifameera.Garuu hamma barbaadametti bu’aan hin argamne. Duulli Bar-kumee haarawaatti Biqiltuu lama dhaabuu adeemsifamee ture.Bu’aan duula sanaan argame rakkoo manca’ina qabeenya bosonaa biyya keenyaa wajjin wal qabatee jiru wajjin yoo wal bira qabamee ilaalamu kan wal gitu miti.

Biqiltuun duulaan dhaabame sunis meeqatu late?meeqatu bade? jedhamee yoo xiinxalamu deebiin quubsaan waan jiru hin fakkaatu.

Kanaaf kan darbe dhiisuudhaan kan fuulduraa yaaduutu wayya waan ta’eef waa’ee duula Biqiltuu dhaabuu baranaatiif xiyyeeffannoo barbaachisu kenninee socho’uu qabna.

Muummichi ministiraa keenya jabaan fakkeenya ta’anii biqiltuu dhaabaa jiru.Kutannoofi xiiqiin Dr.Abiy Ahmad hunda kakaasuu kan danda’udha.Carraaqii guddaa kana kanneen gadi qican jiraatanis hawaasini bal’aan biyyattii ni deeggara.Carraaqqii kana deeggaruu qofaan ammoo gahaa hin ta’u,qabatamaan hojiidhaan mul’achuu qaba!

Biqiltuu kan dhaabnu dhaloota ammaa qofaaf miti.Dhaloota boruutiif yaaduudhaan hegeree boruu miidhagsuuf har’a Biqiltuu dhaabuu qabna.Xiyyeeffannoo mootummaan dhimma kanaaf kenne kana sababeeffachuudhaan har’a yoo hojjechuu baanne rakkooleen har’a nu marsan borus hin dhabaman.

Kanaaf kan boruu miidhagsuuf har’a carraaquutu furmaata waaraa fida waan ta’eef haala mijaawaa amma jirutti fayyadamuudhaan hegeree boruu miidhagsuuf akkaataa saganteeffameen har’a Biqiltuu haa dhaabnu!