Oromiyaatti haalawwan dheekkamsa Ummataa finiinsan mul’achaa jiru

Ummanni bal’aan Oromiyaa sabaafi sablammoota kanneen biroo wajjin waliigaluudhaaniifi waldanda’uudhaan akkaataa ittiin jiraatu sirritti beeka,Oromoon gama kanaan muuxannoo bal’aa kanneen birootiif ta’uu danda’us qaba.Ummanni bal’aan sabaafi sablammoota kanneen biroo wajjin obbolummaafi waljaalalaan jiraateefi ammas jiraachaa jiru kun humnoota adda addaa bu’ura Itiyoophiyaa ta’uusaa hubataniin miidhamaa akka jiru qabatamaan mul’achaa jira.

Oromoofi Oromiyaan utubaa Itiyoophiyaa akka ta’an namni shakku kamiyyuu sammuunsaa fayyaa ta’uusaa shakkuu qaba.Miidhaa sirnoonni cunqursitoonni kanaan duraa irraan gahaa turan ilaaluudhaan Oromoon ammas miidhama ofirraa qolachuu hin danda’u jechuun humni yaadu kamiyyuu umuriisaa gabaabsaa akka jiru beekuutu irraa eegama.

Dhiyeenya kana aanaalee godinaalee Harargee bahaafi lixaa,aanaalee gammoojjii godina Baalee akkasumas godina Booranaa aanaa Moyyaaleetti hidhattoonni Moqaadishoo irraa dhufan,milishoonni Naannoo Sumaalee Itiyoophiyaafi humni poolisii addaa naannichaa gocha qaanessaa lammii irratti raawwataniin  lubbuun Namaa darbeera, qabeenyi barbadaa’eera,jiraattoonni hedduunis qayee isaaniirraa baqachuuf dirqamaniiru.

Lammiiwwan hidhattoota dhokatanii socho’aniin haleellaan itti aggaamamee lubbuun isaanii darbe malees namoonni hedduun madaa’anii wal’aanamaa akka jiran odeeffannoon biiroo dhimmoota koomunikeeshinii mootummaa Naannoo Oromiyaa irraa argame mul’iseera.

Lubbuun lammiisaa ergamtootaan yoo dhabamsiifamu Oromoon callisee ilaalu godinaalee Oromiyaa 20 keessa akka hin jirre beekamuu qaba!Mootummaan Demookraatwa Federaalawaan keenya dhimma kana of eeggannoodhaan hordofuun fala waaraa argamsiisuu akka danda’u ni hubatama.

Haa ta’uutii haalli qabatamaan jiru wal amantaa kana kan mul’isu akka hin taane namoota baay’eetu dubbachaa jira.Mootummaan Federaalaa tumsaafi miseensummaa mootummoota naannoleetiin dhaabbate bu’urrisaa yoo diigamu maal nadhibeedhaan qarqara dhaabbatee kan ilaalu yoo ta’e ergaan diinoota Itiyoophiyaa biyya keessas ta’e biyya alaa jiraniif darbu maal akka ta’e hubachuun barbaachisaadha.

Dhiyeenya kana biiroon dhimmoota koomunikeeshinii Oromiyaa akka ifoomsetti Namni suuraan daawwachaa jirtan kun Doolaara Ameerikaa kuma 500fi kuma 41fi 841 qabatee imalaa utuu jiruu poolisoota Oromiyaatiin too’annoo jala oolfameera.Namni kun seeraaf dhiyaatee dhimmisaa ilaalamaa jira.Haa ta’uutii maallaqni hammi kun hordofamee utuu too’annoo jala oolfamuu baate Oromiyaa jeequufi Nagaa booressuuf kan oolu akka ta’e shakkamuu hin qabu.

Amma dhimmi dhimma Daangaa akka hin taane hubatameera.Lolli hidhattoonni moqaadishoodhaa dhufanii itti hirmaatan dhimma waldhabdee daangaa Oromiyaafi Sumaalee Itiyoophiyaat jedhamuu hin danda’u.

Dhuguma Ummanni Oromiyaafi Sumaalee Itiyoophiyaa walfuudheera,wal irraa horeera,waliin jiraateera,ammas walumaan jiraachaa jira.Haala amma jiruun Ummata Oromoofi Sumaalee Itiyoophiyaatu waldhabe jechuun hin danda’amu.Oromoofi Sumaaleen boruus akkuma kanaan duraa waliin jiraata.Humnoonni maqaa ummattoota kanaatiin fedhii dhuunfaa guuttachuuf wixiffatan garuu qofaatti hafuusaanii garanumaa hubachuu qabu!