Humni moo’ame maal gochaa jiraa? Hooggansi ABO’hoo maalif burjaaja’e?

Humni jijjiirama biyya keenyaa mormu maal gochaa akka jiru quba qabnaa laata?Gareen jijjiirama hin barbaadu ida’amuus hin fedhu jedhe maal hojjechaa akka jiru sirritti beekuudhaan dura dhaabbachuun barbaachisaadha.Humna kana dura dhaabbannee yoo qolachuu dadhabne gabrummaa suukaneessaadhaaf of saaxiluu keenya beekuun barbaachisaadha.

Gabrummaan Ummata keenya mataa gadi qabachiisee ture lammata akka deebi’uuf hin feenu!Fedhiin keenya kun kan dhugoomuu danda’u tooftaafi adeemsa mormitoota jijjiiramaa baruudhaan nus malaafi tooftaa ofii baafannee socho’uun dirqamadha.

Humni moo’ame waan harkaa baate harkatti deebifachuuf tooftaawwan adda addaatti fayyadamaa jira.Tooftaan jalqabaa humna maallaqaatti fayyadamuudha.Akka beekamutti gareen kun waggoota taayitaarra turetti maallaqa sababa adda addaa uumee saameefi saamsise amma jijjiirama argame gufachiisuuf sirrtti itti fayyadamaa jira.Kanaaf ragaa qabatamaa ta’ee kan dhiyaachuu danda’u jeeqamsawwan iddoowwan adda addaatti kanaan dura mudataniifi ammas mudachaa jiran qaamota qindeessaniifi raawwataniif maallaqqa birrii miliyoonaan lakkaa’amu kan ramadeefi kunis shakkamtoota too’annoo jala oolaniin kan himame ta’uusaati.

Akka shakkamtoonni too’annoo jala oolan garee poolisii qorannaa yakkaatiif mirkaneessanitti mahaallaqni jeeqamsa babal’isuuf oolu karaa baankiitiin qindeessitoota jeeqamsaatiif ergameera.Fakkeenyaaf jeeqamsa ganna darbe Burraayyuutti mudateef qindeessaa jeeqamsaatiif birriin miliyoonni 8 ergameera.Maallaqni kun kashalabboota jeeqamsa babal’isaniif kaffalameera.Ragaan qaama dhimmi ilaallatuun qulqulleeffamee dhiyaate haqa kana mul’isa.Sababa deeggarsa kanaatiin yakki suukaneessaan Magaalaa Burraayyuutti akka mudatee darbe ni yaadanna.

Jeeqamsi haala kanaan qabsiifame guutuu biyyattiitti akka hin babal’anneef manguddoonni Gaamoo waan seena qabeessa hojjetaniifi manguddoonniifi Abbootiin Gadaa Oromootis Nagaan akka bu’uuf shoora isaan gumaachan yoomillee hin dagannu.

Deeggarsa raayyaa fees-buukiitiif taasifamu

Ololli farra jijjiiramaa akka finiinuuf kallattii adda addaatiin waan hojjetamaa jiru beekuun barbaachisaadha.Olola kana beekuu qofa utuu hin taane dura dhaabbachuunis dhimma murteessaadha.Teeknooloojiin kun farreen jijjiiramaa qofa miti kan fayyadu.Nuti deeggartoonniifi abboonni jijjiiramaas duula karaa raayyaa fees-buukiitiin nutti baname ofirraa qolachuu ni dandeenya.

Haala raayyaa fees-buukiitiif deeggarsi ittiin taasifamaa jiru haa ilaallu.Akkuma jeeqxoota iddoo adda addaatti bobbaafamaniif mahaallaqni ol’aanaan kaffalamu raayyaa olola fees-buukii iddoo adda addaa taa’ee hojjechaa ooluufis mahaallaqni ramadamee sochiin farra jijjiiramaa taasifamaa jira.Inni kun ol’aantummaadhaan kan raawwatamu karaa actiivistoota beekamoo ta’aniin akka ta’e beekamuu qaba.Fakkeenyaaf actiivistoonni Tigiree maqaadhaan beekaman kan akka Daniel Birhane fi Dawit Kebede ol’aantummaadhaan kana hojjetu.Karaa akkaawuntii ofii qabaniin ololli afarsan akkuma jirutti ta’ee miseensoota raayyaa fees-buukiitiif mahaallaqa miliyoonaan lakkaa’amutu baasii ta’a.

Namoota kana fakkeenyumaafan kaase malee kanneen biroonis hedduutu jira.Raayyaan fees-buukii kun ol’aantummaadhaan hojiin hojjechaa jiru jijjiirama qabatamaan mul’ate gufachiisuuf ergaawwan adda addaa faallaa ta’an dabarsuu irratti kan xiyyeeffatedha.Oduun sobaa bal’inaan tamsaafama.Iddoo akkanaatti wanti akkanaa raawwatame,Sabni abaluufi abaluu walitti bu’e jechuun oduu sobaa omishuudhaan tamsaasaa oolu.Kanaaf wanti fees-buukiis ta’e miidiyaawwan hawaasummaa kanneen biroo irratti himamuufi dhiyaatu hundi dhugaadhamoo miti jechuun adda baafachuun murteessaadha.Summii isaan oomishanii facaasaa oolaniin raafamuufi burjaaja’uun barbaachisaa miti.Isaan ergama isaaniif kenname ba’aa jiru.

Ajandaa guyyuutti karaa hooggantoota isaanitiin bocamee kennamu tamsaasaa oolu waan ta’eef oduu jette jettee isaaniitiif iddoo kennuu hin qabnu.

Humna jijjiirama mormaa jiruufi namoota mufatan

Humni jijjiirama mormaa jiru hunduma keessa akka jiru beekamuu qaba.Miseensoota saba Tigiree faayidaan jalaa tuqame qofatu jiijjiirama Qeerroo Oromoofi hooggansa haaromsaatiin dhufe mormaa jira jechuudhaan yaaduun dogongora ta’a.Kan faayidaansaa jalaa tuqameefi karaatti gufatee hafe hundi keessa jira.

Oromoo jijjiirrama amma dhufe kana mormuufi humna jijjiirama gufachiisuuf socho’aa jirutti maxxanee jiru qabatamaan yoo agarru akkamitti kana shakkinaa? Keessumattuu hunda ta’uu baatanis kanneen kanaan dura taayitaarra turan faayidaan isaanii waan jalaa tuqameef humna jijjiirama gufachiisuuf socho’aa jiru akka deeggaran shakkamuu hin qabu,isaanis faayidaan isaanii waan jalaa tuqameef mufachuudhaan waan irra jiran beekna.

Utuu mufachuu baatanii beekkamtii qabanitti fayyadamuudhaan haala jijjiiramni hin gufanneen socho’u ture.Fuula Kumaa Dammaqsaa Jarman Firaankfartiitti hirmaattoota waltajjiitiin mormamnaan dhiyeenya mul’ate yaadachuun barbaachisaadha.kanneen hafanis akkasuma,muufiinsaanii fuuluma isaanirraa beeksisa.

Kun salphinadha,waa lama dhabuudha.Mufattoonni yoo abshaalomuu barbaadan gara ummata bal’aa goruu qabu.Gareen muraafni mufiidhaan jijjiirama gufachiisuuf socho’u hamma humni maallaqaa kuufate jalaa dhumu qofatti wixxiffata.Booda mataa gadi qabachuunsaa waan hin oolledha.Humna ummataa kan caalu jiraaree?Jijjiiramni hooggansa haaromsaatiin qajeelfamaa jiru ummata bal’aadhaan kan deeggaramedha.Waan ummata bal’aadhaan deeggarame kana gufachiisuuf socho’uun yaalii bira kan darbu ta’uu hin danda’u.

Hooggansi ABO maalif burjaaja’ee?

Addi Bilisummaa Oromoo(ABO’n) dhaabbilee Ummanni Oromoo gabrummaa keessaa akka ba’uuf adda durummaadhaan qabsaa’an keessaa tokkodha.Qabsoo farra gabrummaa waggoota  hedduuf taasiseenis dhaaba beekamaadha.Ummanni Oromoo fayyadamaa mirgaafi faayidaasaa akka ta’uuf falmii taasiseefis ummata biraa galata guddaa qaba.Muuxannoon qabsoo ABO’n dhaabbilee Ummata Oromootiif qabsaa’an kanneen birootiif dabarses akka waan salphaatti kan ilaalamu miti.

Wareegamni ABO’n waggoota hedduuf kaffale lakkaawwamee kan dhumuu danda’u miti.Miseensonniifi deeggartoonni addichaa wareegama yeroo adda addaatti isaan baasan dagachuun hin danda’amu.Wareegamni kun fashalaa’ee hafuu hin qabu.Iddoofi kabaja isaaf malu argachuu qaba.Qabsoo kana keessatti beektotaafi ijoollee Oromootu wareegame.Wareegamni Ijoollee Oromoo faayidaa murnootaa yerootiif jecha fashalaa’uun salphina guddaadha.

Karaa birootiin hooggansi haaromsaa keenya dhaaba umurii dheeraa lakkoofsise kanaaf kabaja ol’aanaa kennuudhaan(kennuus qabu) Hooggantoonni ABO biyya alaa jiraachaa turan karaa nagaatiin biyyatti deebi’anii akka socho’aniif carraaqqii ol’aanaa taasisuun milkaa’eeraafi.

Hooggantoonni ABO waamicha dhiyaateef kabajuudhaaniifi fudhachuudhaan jalqaba baatii Fulbaanaa bara 2011 irra gara biyyaatti deebi’aniiru.Kanaafis galata guddaa qabu.Murtee seena qabeessa kanaan gammachuun Ummata bal’aa Oromootiif uuman daangaa kan qabu miti.Simannaa Finfinneetti hooggansa ABO’f jalqaba torban baatii fulaanaarra taasifame yaadachuun barbaachisaadha.Simannaa ho’aafi seena qabeessa kan yoomillee dagatamuu hin dandeenyetu taasifame.

Waa’ee simannaa kana wajjin walqabatee raayyaa ABO Eertiraa turuudhaan gara biyyasaatti deebi’eefis Maqaleefi magaalota Naannoo Tigraay gara garaatti simannaan taasifameera.Sirna simannaa WBO’tiif Maqaleetti taasifame irratti qaamonni jijjiirama hooggansa haaromsaatiin dhufe balaaleeffatan waan argamaniif battala sanitti dhimmichi ajandaa marii ta’ee tureera.Dhugaa qabatamaan jiruun miseensoonni WBO karaa Maqaleetiin biyyatti deebi’an jiddu gala leenjii Ardaayitaatti leenjifamaa turaniiru.Leenjiisaanii erga xummuranii boodas haala jireenyasaanii idilee ittiin fufan irratti kallattiin ni kaa’ama jedhamee eegama.

Kun utuu kanaan jiruu Karaa Oromiyaa lixaatiin waan ta’aa jiru beekna.Kun maalif ta’e? jechuudhaan gaafachuun murteessaadha.Humni jijjiirama mormuufi Maqalee da’oo godhatee jiru miseensoota WBO iddoo adda addaatti harca’anii hafaniifi humna ofii qindeessaa jiru dabaluudhaan jijjiirama gufachiisuuf socho’aa akka jiru haaluma qabatamaan jirutu mul’isa.

Hooggansi ABO dhimma kana wajjin wal qabatee murtee sirrii waan murteessuu dadhabe fakkaata.Olollii gamaa-gamanaa afarfamaa jirus hooggansa ABO burjaajessaa waan jiru fakkaata.Kana qabatamaan kan mul’isu yaada hooggansi ABO sab-quunnamtiilee adda addaatiif kennaa turedha.

Fakkeenyaaf dura taa’aan ABO Ob.Daawud Ibsaa dhiyumma kana yaada sagalee Raadiyoo Ameerikaatiif kennaniin waliigaltee mootummaa Itiyoophiyaa wajjin taasifne wayita hojiirra oolchaa jirrutti hidhattoota keenya irratti tarkaanfiin fudhatamuu  hin qabu jechuun dubbataniiru.Kana jechuun WBO hidhatee socho’u ammas jira jechuudha,Kun ammoo waliigaltee karaa nagaatiin socho’uu jedhu wajjin faallaadha,gonkumaa walitti dhufuu hin danda’u.Qawwee qabachuudhaan karaa nagaatiin socho’uu wanti jedhamu hin jiru.Kun dhugaa qabatamaadha.Burjaaja’uumsi hooggansa ABO asirratti jalqaba.Burjaaja’uumsa kana duuba ammoo humni jijjiirama gufachiisuu barbaadu akka jiru haalli qabatamaan jiru mul’isaa jira.

Humni jijjiirama gufachiisuu barbaadu akkuma dur bare Ummata walitti buusuudhaan faayidaa ofii eegsifachuu barbaada.Kanaaf carraan xummuraa humni kun itti fayyadamuuf deemaa jiru Oromoota wal ficcisiisuudhaan taayitaa dhabetti deebi’uudha.Biyya tana hoogganaa kan jiru Oromoodha.Oromoon Oromoo irratti duule duulchisiise jechisiisuuf waan ta’aa jiru argaa jirra.

Abshaalummaan Oromoon qabu iddoo kanatti barbaachisaadha.Diinni faayidaa ofii dhabe harkatti deebifachuuf wixiffachaa jira.Oromoon hundi kana dura dhaabbachuu qaba.Diinaaf akka milkaa’uuf jecha Oromoon wal ajjeesuu hin qabu.Dhaabbileen maqaa Oromootiin qabsaa’aa jiran hundi dammaquu qabu!Hayyoonni Oromoo kan dogongore barsiisuutu irraa eegama.Qeerroofi qarreen Oromoo manguddoonniifi Abbootiin Gadaa Oromoo amma hojii cimaa of harkaa qabu.

Hooggantoonni paartiiwwan Oromoo itti gaafatmummaa seenaa jalaa ba’uuf yeroon kutannoofi abshaalummaadhaan itti hojjechuu qaban ammadha.Hooggansi ABO’s haala jiru kanaan burjaaja’uu hin qabu.Fedhii Ummata bal’aa Oromoo jiddu galeessa taasifachuudhaan socho’uutu irraa eegama.Oromoon nagaa barbaada injifannoo siyaasaa argate diinagdeedhaanis dbaluu barbaada.Jaalatamummaa Saba Oromoo biraa qaban cimsanii itti fufsiisuudhaaf hooggantoonni ABO sadarkaadhaan jiran,miseensonniifi deeggartoonni addichaa amma dammaqanii,haala jiru xiinxalanii socho’uu qabu.Miraaniifi harkisaa duubaa hordofuudhaan socho’u taanaan Saba Oromoo guddicha dabalatee sabaafi sablammoota Itiyoophiyaa gabrummaa suukaneessaafi daangaa hin qabnetti deebisuuf socho’aa akka jiran hubachuudhaan itti gaafatamummaa seenaa jalaa ba’uuf yaroon itti dammaquu qaban ammadha.