Injifannoo guddaa dinqisiifatamuu qabu!

Biyyi Ollaa Itiyoophiyaa taate Suudaan waan tibbana jette dhageenyee jirra.Kan odeeffannoo kana hin dhageenye ykn.hin dubbifne Suudaan maal jettee?jechuudhan gaafachuun isaa hin oolu.

Eyyeen Suudaan waan Itiyoophiyaan barbaaddu goote.Kun waliigaleefi inijifannoo guddaadha!.Suudaan himni hidhate kamiyyuu daangaa Itiyoophiyaafi Suudaan qaban irra akka socho’uuf gonkumaa hin hayyamu jechuudhaan mirkaneessitee jirti.

Ministeerri ittisaa Suudaan humni hidhate kamiyyuu daangaa biyyaalee lamaanii jidduu akka hin sochoone ittisuuf Itiyoophiyaa waliin tumsa cimaa taasisuudhaan kan hojjetu akka ta’e mirkaneesseera.

Dubbii Himaan Ministeera Ittisa Biyyaa Sudaan Birgaadeer Janaraal Nabiil Abdullaah ibsa tibbana kennaniin,rakkoo daangaa Suudaanii fi Ityoophiyaa jidduu jiru hiikuu fi furmaata hatattamaa argamsiisuuf hoggantoota biyyoota lamaanii waliin mariin taasiifamaa akka jiru mirkaneessaniiru.

Bu’uura marii qondaaltoota biyyaalee lamaanii kanaan koreen teeknikaa mana maree nageenyaa fi ittisaa biyyattii walgahii Dilbata darbe gaggeesseen Sudaan Ityoophiyaa waliin qindoomina uumuun humni hidhatee jiru kamiiyyuu daangaa biyyoota lamaanii gidduutti akka hin sochoone ittisuuf akka murteesse himameera

Daangaan Galaabaat Sudaanii fi Ityoophiyaa karaa Matammaa naannoo Amaaraa walqunnamsiisu cufamee tures akka banamuuf murtaa'uun eerameera.Akkaataa waliigaltee kanaatiin humna kamiyyuu jechuun maal jechuu akka ta’e qalbeeffachuun barbaachisaadha.

Gareen shororkeessaan wayyaanee Itiyoophiyaan akka bittinnooftuufi akka diigamtuuf karoorfatee waan hojjechaa tureef wayita waggaa tokkoon dura Naannoo Amaaraafi Affaar weereeretti gama hundumaanuu kan qophaa’e waan tureef humna hidhataa ‘Saamirii’jedhee moggaase sanuu akka himamaa turetti kan lakkoofsaan kuma 30 caalu gara Suudaanitti ceesisee ture.

Humna ‘Saamrii’ Suudaan turuudhaan yeroo adda addaatti gara Itiyoophiyaa as ce’uun miidhaa geessisaa ture keessaa ammaan tana meeqa akka jiru beekamuu baatus waliigalteen amma Itiyoophiyaafi Suudaan taasisan sochii Saamriis kan ittisudha.

Wayyaaneen keessaafi alaan dhiphina cimaa uumuun akkuma karoorfattetti Itiyoophiyaa bittinneessuuf wixiffattus kan karoorsittee qabatteefi yaadde hin milkoofneef,karaatti jalaa fashalaa’ee hafe.

Gareen Saamrii naannawa daangaatiin as ce’uuf akka malee socho’aa tures yeroo adda addaatti Raayyaa Ittisa Itiyoophiyaatiin barbadeeffamuudhaan wayyaaneen dhawaataan abdii akka kutattu taasiseera.Gareen daangaa Suudaan irra turuun miidhaa geessisuuf yaalu ammaan booda hin jiru.Waliigaltee Suudaan Itiyoophiyaa waliin tibbana taasiftete kana ni dhorka.

Mootummaan Suudaan waliigaltee kana irra akka ga’uuf sochiin ummanni Suudaan dhiyeenya kana taasise shoora ol’aanaa akka gumaache amanama.Aantummaan Ummanni Suudaan Itiyoophiyaaf qabatamaan mul’ise kan yoomiyyuu dagatamu miti.Ummanni Suudaan Ummata Itiyoophiyaa wajjin Nagaadhaan,ollummaa gaarii barameen jiraachuu akka barbaadu hiriira mormii dhiyeenya walitti fufiinsaan taasise irratti qondaaltoota Suudaaniif ergaa guddaa dabarseera.Qondaaltoonni biyyattii gaaffii ummata Suudaaniif deebii kennan galata qabu.Waliigaltee Itiyoophiyaafi Suudaan tbbana taasisan kanaan daran kan fayyadaman ummattoota Itiyoophiyaafi Suudaan waan ta’aniif waliigaltee kana dinqisifachuufi hojiirra akka ooluuf hojjechuun dhimma murteessaadha.