Xiinxala bu’aa wal ga’ii idilee A.D.W.U.Ifi kallattii fuulduraaf kaa’ame Kutaa 2ffaa

Addi dhaabbilee siyaasaa afur miseensummaadhaan of jalatti qabateefi Adda Demookraatawa Warraaqasa Ummattoota Itiyoophiyaa(ADWUI) jedhamuudhaan beekamu waggoota muraasa keessatti biyya maqaanshee Addunyaa irratti bushaa’ee ture jijjiiruu danda’eera.Har’a Itiyoophiyaan kadhaafi hiyyummaa suukaneessaadhaan beekamtu hin jirtu.

Har’a Itiyoophiyaan balaa hoongee yeroo yeroon waggaa lakkaa’ee itti deddeebi’uun lammii isheerratti roorrisu moo’achuu dadhabuun Qamadii kadhachuuf harkashii hawaasa idila Addunyaatiif diriirsuudhaan maaloo nadhaqqabaa jettu hin jirtu.

Itiyoophiyaan har’aa humna diinagdee qabduun onnattee rakkoo mudatuun hunda ofumaan keessaa ba’uuf kan carraaqxudha.Itiyoophiyaan har’aa dhiibbaa humnoota biyya alaatiif kan jilbiinfattu utuu hin taane imaammataafi tarsiimoo amansiisaa qabduun faayidaa biyyaalessaatiif dursa kennuudhaan kan sochootudha.

Itiyoophiyaan har’aa biyya saboonni sab-lammoonniifi ummattoonni biyyattii eenyummaa isaaniitiin qaana’aniifi leeyya’anii mataa gadi itti qabatan utuu hin taane biyya eenyummaafi maalummaa isaaniitiin onnee guutuudhaan amanuudhaan itti boonanidha.

Itiyoophiyaan har’aa biyya hundumtuu walqixa socho’uun tokkummaa demookraatawa wal kabajaafi wal jaalala irratti hundaa’e ijaaraa jirtudha malee kan ol’aantummaa gareewwan saba tokkoo lelistu miti.Itiyoophiyaan haarawaan har’a jirtu kan kanaan duraa wajjin yoo walbira qabamtee ilaalamtu maal akka fakkaattu sababoota qabatamaa hedduu kaasuufi tarreessuudhaan himuun nidanda’ama.

Jijjiiramoota kana hundaaf bu’ura bal’aa kan kaa’e toora ADWUI akka ta’e beekamuu qaba.Toora adda kanaa irratti hundaa’uudhaan waggoota darban keessa saboota sab-lammootaafi ummattoota biyyattii hunda tokkummaadhaan sochoosuun utuu danda’amuu baatee Itiyoophiyaan har’aa tun jiraachuu hin dandeessu.

Bu’aa hanga ammaatti galmeeffame kanaaf miseensoonni addichaa Dhaabbanni Demokraatawaan Ummata Oromoo(Dh.D.U.O) Addi bilisa baasaa ummata Tigraay(ABBUT)Warraaqsi Demokraasummaa saba Amaaraa(WDSA) akkasumas warraaqsi Demokraasummaa Ummattoota Itiyoophiyaa kibbaa(WDUIK)fi dhaabbileen deeggartoota addichaa Naannolee guddachaa jiran bulchan ummattoota Naannoo isaanii sochoosuudhaan bu’aa Mootummaan ADWUI’tiin hoogganamaa jiru argamsiiseef shoora gamasaanii gumaachaniiru.

Bu’aawwan hanga ammaatti galmeeffaman qabatamaan mul’achuu kan danda’an bu’ii ba’ii hedduu keessa darbuudhaan akka ta’e yaadatamuu qaba.ADWUI’n sirna abbaa irree Darguu fonqolchuudhaan Itiyoophiyaa bulchuu erga eegalee turtii waggoota kudhanii booda qoruumsi cimaan balaa addaan fofoxxoquu mudateeraani, kan moggaafni maqaa “Aanjaa” jedhu kennameef.Wayita kanatti abbootiin taayitaa sadarkaa adda addaa irratti argaman sababa ilaalcha of tuulummaafi kiraa sassaabdummaatiin dhiita’an adda kana diiguudhaan ol’aantummaa isaanii mul’isuuf carraaqaniiru.Mudannoon kun naannawa bara 1990moota keessa akka ta’e ni yaadatama.

Haa ta’uutii hoogganaa bilichina qabu Jaallee Mallas Zeenaawii’tiin carraaqqii cimaa taasifameen biyyi teenya deebitee kufiinsa suukaneessaa keessa seenuu irraa baraaramtee jirti.Tarkaanfiiwwan battalatti fudhatamaniinis murnoonni fincilan adda of baasuudhaan iddoo taayitaa qabatanii turan irraa akka ka’an taasifameera,isaan kallattii filatan qabatan,qaamoleen toora ADWUI’tu nubaasa jedhanis  toorri addichaa akka itti fufu taasisuudhaan sochii haaromsaatti seenan.

Sochii haaromsaa kallattiidhaan deeggaramee taasifameen kan ilaalchaafi gochaan tortoreefi shame iddoosaa akka qabatu taasifame,kanneen xuraa’an ammoo akka of qulqulleessaniif carraa kennuudhaan imala haaromsaatiin sochiin Nagaa Misoomaafi Demokraasii akka itti fufu taasifame.Bu’ii ba’ii waggoota haaromsaa 15 keessatti mudannoowwan adeemsaan mudatan maalfa’i?Koreen hojii raawwachiiftuu ADWUI raawwii haromsaa waggoota 15 maalif qorate? Kutaa itti aanu keessatti ilaalla.