Qabiyyee guutuu ibsa koree jiddu galeessa adda bilisa baasaa Ummata Tigraay

Hooggansi tokkommaa yaadaafi gochaa dhabeera.ilaalchaafi gocha farra demookraasii keessa cuuphamuudhaan gabaasa sobaatiin hanga of badhaasuu ga’uudhaan,Ummataafi kaayyoo duursuu manna faayidaafi kabaja ofii duursa.

Ummannis gaaffisaatiif deebii waan dhabeef booruuf abdachaa gocha har’aa obsullee, of keessatti shakkii qabateera.

Wal ga’iin koree jiddu galeessa adda bilisa baasaa Ummata Tigraay waan xumurameef turtiin maree guyyoota 35 ifoomsameera. Inni kun ibsa koreen jiddu galeessa addichaa kaleessa sadaasa 21 bara 2010 baase irraa kan fudhatamedha.

Waa’ee qabiyyee isaarratti sanada qorannoo walfalmiin yaadaa bal’aan irratti taasifamedha.Kunis hooggansa ol’aanaa dhaabbatichaa tarsiimawaa jedhame irratti kan xiyyeeffatedha.

Dur, wayita qabsoo hidhannootti adeemsa kamirrattuu dhaabbatichi qoruumsa keessaayis ta’e alaa isa mudatu bilchina gahaafi hooggansa saayinsaawaadhaan akkasumas ummataafi miseensa hirmaachisuudhaan adeemsa amansiisaadhaan fala argamsiisa.Kunis imala milkaa’inaa dhaabbaticha injifannoo biraan ga’edha.

Ibsi koree jiddu galeessa dhaabbatichaa yaada waa’ee seenaa irratti kaaseen addi bilisa baasaa Ummata Tigraay ummata of maddii hiriirsuun,ofiifis ummata wajjin hiriiruun baroota socho’etti hanqinasaa dhiifama malee hanbisaa, hooggansa abbaa dhaaba seenaa cululuqaa wareegamaan utubame hojjete akka ta’e mirkaneesseera jedha.

Waggoota dhiyoodhaa asitti garuu hooggansi dhaabbatichaa maraammartoo rakkoo keessaa ba’uu dadhabuudhaan yoo gitintiru mul’ateera,gaaffii ummataatiif deebii gahaa kennuu akka dadhabe qabatamaan argameera.

Qorannoon koree jiddu galeessaa, dhaabbaticha kanaan kan ga’e hooggansa ol’aanaa tarsiimawaa gubbaarra jirudha jedheera.

Hooggansi kun waggoota dhiyoodhaa asitti hammentaan ittiin dadhabe ergamasaa ba’uun hanga hir’atutti ilaalchaafi ijaaramnisaa sigigaateera.Hooggansi dhaabbatichaa rakkoo ummtaatti fala utuu hin argamsiisin injifannoowwan muraasaan boona.Madda rakkoo ta’uudhaanis aantummaan ummataaf qabu hir’ateera.

Wal ga’ii koree jiddu galeessa adda bilisa baasaa Ummata Tigraay guyyoota 35’f ture irratti sanadni bal’aan dhiyaate haala waliigalaa dhaabbatichaafi hanqina hooggansaa sirrtti kan sakatta’e akka ta’edha kan eerame.

Hooggansi tokkommaa yaadaafi gochaa akka dhabe,ilaalchaafi gocha farra demookraasiitti bal’inaan akka seenes mirkanaa’eera.Ummataafi kayyoo duursuu manna faayidaafi kabaja ofii duursuudhaan aantummaa ummataaf qabu dhabeera.

Tajaajiluu manna akka tajaajilamaatti of ilaaluunsaa,hanga gabaasa sobaatiin of badhaasuu ga’uunsaa gara gita bittaa maxxanaatti hanga ce’uutti rakkoo bal’aa keessa seeneera jedha,Sandni qorannaa kooreen jiddu galeessa adda bilisa baasaa Ummata Tigraay mareefi falmii bal’aa taasisee irratti waliigale.

Ibsi  sanada kana irratti bu’uraayes hanqinni hooggansa ol’aanaa raawwii galmoota damee siyaasaafi diinagdee irratti dhiibbaa ulfaataa uumeera jedheera.

Bu’aafi Jijjiiramoonni hedduun waggoota darban keessa galmeeffaman itti hinfufne.al tokko tokkos gara boodaatti yoo deebi’an mul’ateera.

Hooggansi dhaabbatichaa ofiif dadhabuusaarrayyuu humni ga’oomeefi gara fuulduratatti dhaabbaticha hoogganu akka hin horatamneef gufuu ta’ee akka ture amantaan ummanni dhaabbaticha irratti qabu akka dhabamuuf balbala banuunsaa dhiibbaawwan mul’atan keessaa kan eeraman akka ta’n ibsa kanaan eerameera.

Hanqina kana hundaaf waligalatti kan itti gaafatamu koree jiddu galeessa dhaabbatichaa, maddi rakkoo hamaas akka qaamaafi dhuunfaatti  gateettii koree hojii raawwachiisaa adda bilisa baasaa Ummata Tigraay irra jira jedhameera.

Miseensoonnis sadarkaa isaaniitti akka medaalamaniif kallattii kaa’uudhaan qorannoon jijjiirama hooggansa koree  hojii raawwachiisaa dhaabbatichaa fide taasifameera.

Qorannichis jedha ibsi ejjennoo dhaabbatichaa, rakkoo tokkummaa yaadaafi gochaa dhabuu hooggansa ol’aanaa biratti bal’inaan mul’ate buqqisee gatuudhaan hooggansi haarawaan akka filatamu taasiseera.

Ibsa qorannoofi filannoo hooggansa haarawaa booda ba’een miseensoota dhaabbatichaafi ummata naannichaatiif waamichi dhiyaateera.

Hooggansi ol’aanaan adda bilisa baasaa Ummata Tigraay fedhiifi gaaffii ummataatiif deebii kennuu dadhabuudhaan hanqina ol’aanaa akka mul’ises ifoomseera.

Ummanni garuu obsaafi abdiidhaan akka eege hubadheera kan jedhe ibsi koree jiddu galeessa dhaabbatichaa  ammaan booda dhaabbatichi gaaffii ummataa deebisuufi amanamummaa dhabes haaromsuuf kutannoodhaaniin socho’a jechuun waadaa galeera.

Hayyootaafi abbootii qabeenyaa sababa dhibaa’ummaa hooggansaatiin dhimmoolee naannoofi biyyaa irratti hirmaachuu hin dandeenyeef ammaan booda hooggansi adda bilisa baasaa  ummata Tigraay ijaarama barbaadaniin dhimma biyyaa irratti akka hirmaataniif hojmaata idilaawaa nan uuma jechuunis waadaa galeera.

Dhaabbilee obbolaa ADWUIfi dhaabbilee deeggrtootaafis dhaamsa dabraseera.Hanqinni hooggansaa adda bilisa baasaa ummata Tigraay keessattis ta’e sochii misoomaafi ijaarsa demookraasiitiif carraaqqii taasifamu irratti dhiibbaa geessiseera.Garuu kanaan hin dhaabbanne.dhaabbilee obbolaafi deeggartoota jidduutti qabsoon waggotaaf qajeelfama irratti bu’uraaye akka hin jiraanneefis dhiibbaa uumeera.

Kaayyoo waliin wajjiniirratti yaadaafi onnee tokkoon socho’uu mannaa, wal mormiifi wal shakkiin akka jiraatu taasisuun gaaddidduu uumeera.

Sababa kanaan dhaabbileen kun humnoota maxxantoota alaafi keessaa walga’an qolachuuf humni qaban akka quucaruuf balbala baneera.haalli qabsoon waliin wajjinii itti daddaaqeefi gufachuu itti eegale akka uumame hubadheera kan jedhe addi bilisa baasaa ummata Tigraay ammaan booda qajeelfama waliin qabsaa’uurratti bu’uraawuudhaan dhaabbilee obbolaafi deeggartoota waliin qabsaa’uuf walitti dhufeenyakoo nanhaaromsa, kallattiiwwan walshakkii jiru hanbisan hordofuudhaan walta’uumsa cimaafin hojjedha jedheera.

Addi bilisa baasaa Ummata Tigraayiifi Ummanni Tigraay dhaabbilee obbolaafi deeggartoota akkasumas ummattoota Itiyoophiyaa hunda waliin ta’uun walqixxummaafi fayyadammaa haqa qabeessaaf wareegama ol’aanaa baasaniin utuu hin daanga’iniifi godaannifni giti bittoota itti uuman sirritti utuu hin qoorin haalli miidhama dabalataatiif itti saaxilamu akka uumamuuf hooggansa ABUT keessatti hanqinni mudate shoora hin tuffatamne akka gumaache ibsi koree jiddu galeessa dhaabbatichaa waamicha lammiiwwan Itiyoophiyaa hundaaf dabarseen mirkaneesseera.

Kanaanis sochii diigumsaa keessaafi alaa biyyattiifi ummattoota isheerratti aggaamaman qolachuuf ummattoota biyyatti hunda wajjin walitti dhiyeenyaanin hojjedha jedheera.

Wal dhabdeewwan wayita ammaa naannoowwan adda addaatti uumaman karaa nagaatiin fala akka argataniif,gaaffiin misoomaa bulchiinsa gaariifi demookraasii karaa sirrii ta’een deebii akka argatuuf tumsa taasifamu keessatti qoodasaa gumaachuuf akka qophaa’es koreen jiddu galeessa dhaabbatichaa ibsa baase kanaan beeksiseera.

Addi bilisa baasaa ummata Tigraay ijaarsa misoomaafi sirna demookraasii Federaalawa Demookraatawa Itiyoophiyaatiif shoora gumaache cimsee itti fufuuf kallattii gargaaruun irratti ummattoota wajjin mari’achuudhaan hojiirra akka oolchu waadaa kan gale koreen jiddu galeessa dhaabbatichaa ummattoota biyyattiitiif tokkummaa demookraatawa keenya cimsinee diinoota keenya ummattota walitti buusuuf wixiffachaa jiran waliin haaqolannu jechuun waamicha dhiyeesseera.