IBSA KOREE GIDDU GALEESSA DH D U O haaromsa 2ffaa irratti xiyyeeffate

Koreen Giddu Galeessa DH.D.U.O waltajjii haaromsa dhaabatummaa hundeedhaan lafa qabsiisuufi gadi fageegnaan dhaabbaticha haaromsuun dhimma murteessaa boqonnaa qabsoo yeroon barbaaduufi gaafatee akka ta’eefi waltajjii jijjiirama bu’uuraa,injifannoo boqonnaa haarawaa itti galmeessuudhaaf yeroo kamiyyuu caalaa kutannoodhaan qabsaa’uudhaaf qophaa’ummaa qabu kan itti ibseefi miira addaatiin kan mari’ate ta’uu isaa addeessuudhaan,waltajjicha waltajjii qabsoo yeroo murteessaa jechuudhaan kan moggaase yoo ta’u mareewwaniifi waliigaltee seena qabeessarra akka ga’e ifa godheera.

Haaluma kanaan KGG DH.D.U.O maree haaromsa gadi fageenyaa,Fulbaana 4-10/2009 Magaala Adaamaa’tti gaggeesseen milkaa’ina imala haaromsaa waggoota kudha shanii , qormaatilee nu qunnamaniifi ka’uumsa ijoo isaanii akka kanatti aanee jirutti xiinxallee,kallattii fuulduraa kaayee jira.

Woggoota kudha shanan darban keessatti hundaa olitti imala milkaa’e jennee kan fudhannu keessaa ol’aanaan qabsoo duula hiyyummaa fi doofummaa,boodatti hafummaa irratti gaggeessineen baadiyaafi magaalonni Oromiyaa abdi qabeeyyii akka ta’an yeroo itti taasifnedha.

Misooma baadiyaafi qonnaa keenyaan oomishaafi oomishtummaa guddisuudhaan,sirna deeggarsaa ekisteenshinii babaldhifneen,akkasumas teeknolojii diriirsuudhaan diina keenya guddicha hiyyummaa baadiyaadhaa dhawaataan hi’isuudhaan,qonnaan bulaan jireenya isaa jijjiiruudhaaf daandiin deemne ol’aanaadha.Ragaa kana ummata baldhaa Oromootu mirkaneessa.Carraa kanaan Dhaabbanni keenya qonnaan bulaafi horsiisee bulaa akkasumas ogeeyyoota qonnaafi baadiyaa milkaa’ina kanaaf tumsan hundaaf dinqisiifannaafi galata ol’aanaa galchaaf.

Misooma horsiisee bulaa ilaalchisee jireenya ummata horsiisee bulaa jijjiiruudhaaf xiyyeeffannaa ol’aanaa kennameen hawaasa jireenyi isaa fooyya’ee fi fayyadamummaan isaa mirkanaa’e tajaajila bu’uura misoomaa akka argatu,fayyaafi barnootaan dhaqqabamaa akka ta’u,gabaa Beeylada isaafi fayyaa Beeylada isaatiif akkasumas tajaajiala ekistenshinii akka argatuuf sochii taasifameen sadarkaa ol’aanaadhaan jijjiiramni mul’ate abdachiisaadha .

Baadiyyaa Oromiyaa doofummaa jalaa baasuudhaaf misooma humna namaa irratti hojii ol’aanaa hojjanneen lammiin Oromoo miliyoonotaan lakkaa’aman qe’ee isaanii irraa osoo hin fagaatin carraa barnootaa waliin ga’uudhaan har’a sadarkaa boonsaa irraan geenyee jirra.Yeroo ammaatti doofummaan diina ummata Oromoo ta’e fokkisaan sun akka harka kennatuufi lammii Oromoo baratee,qaroome arguudhaaf mana manaan hedduu lakkayyuun danda’amee jira.Dhaabanni keenya injifannoo kana yeroo galmeessu qooda fudhattoota, ogeessotaafi barsiisota milkaa’ina kanaaf ga’ee ol’aanaa gumaachaniif dinqisiifannaa qabnu carraa kanaan ni ibsina.

Baadiyyaan Oromiyaa qe’ee faalamaafi madda dhibee ta’uu jalaa ba’uudhaan imaammata dhibee duursanii ittisuu irratti xiyyeeffateen ummata fayya qabeessa akka qabaannuuf sochii taasifameen jijjiirama ol’aanaa fiduu bira darbee galmoota Barkumee Addunyaa akka milkaa’u gochuu keessatti;keessumattuu,fayyaa Haadholee,kan Daa’immaniifi to’annoo dhibee daddarbaa akkasumas dhaabbiilee fayyaa sadarkaa gadaanaa irraa hanga ol’aanaatti diriirsuu keessatti hojiin hojjetame ol’aanaadha.Hojii kanas yeroo raawwannu hooggansi dhaaba keenyaan kenname akka jirutti ta’ee, ga’een hawaasa baldhaa,Ogeeyyoota fayyaafi qooda fudhattoota adda kanarratti tumsaaniifi galmoota kanneen milkeessaniif galata guddaa galchinaaf.

Gama hundaan Misoomni lafa qabachaa dhufe kun akka milkaa’uufi Misoomni bu’uuraa kan akka waliin ga’iinsa Daandii,Bishaan dhugaatii qulqulluu,Ibsaa fi Bilbilaa sadarkaa jaarraa tokkotti hojjatamee hin beekneen akka babaldhatan taasifamuu isaatiin rakkooleen gurguddaan hudhaa turan akka furamanii fi ammas immoo fedhiin ol’aanaa ummata keenyaa akka jiru dhaabbanni keenya gadi fageenyaan ni hubata.Gama kanaan hanqinoonni akka: harkifannaa,waliin ga’uu dhabuu fi qulqullinaa jiran akka eeggametti ta’ee,hojiin hojjatame madaallii kamiinuu seenaa biyya keenyaa ijaarsa bu’uuraalee misoomaa kan jijjiire akka ta’e ummata keenya irra darbee addunyaan ragaa ba’eera.Dhaabbanni keenya injifannoo guddaa galmaa’e kanaan ni boona.carraa kanaan hawaasa,qooda fudhattootaa fi Ogeessota damee kanneeniifs dinqisiifannaa ol’aanaa qabnu ni ibsina.

Damee Misooma Magaalaa fi Induustriitiin hojiiwwan hojjenne kan Baadiyyaa fi Qonnaa irraa boodatti hafnee kan eegalee fi bara 1997 as cimsinee kan itti fufne yoo ta’u hojiin karaa kanaan rawwannes Ummata Magaalaa fi Baadiyyaa walitti hidhuudhaan Misooma fulla’aa taasisuu,jireenya Magaalaa mijataa gochuufi giddu gala daagaagina induustrii akka ta’an hojiilee gurguddaan hojjatamanii jiru.Keessattuu Hojii dhabummaafi hiyyummaa magaalotaa diiguudhaaf,aadaa hojii cimaa fi lammii hojii hin tuffanne,aadaa qusannaa gabbifachaa dhufe uumuudhaan, misooma IMX lafa qabsiisuudhaan ofitti amantummaafi qabeenya dafqa isaaniitiin akka horatan,bu’uura abbootii qabeenyaa Misooma’aa uumuudhaaf carraaqqii taasifameen abdiin guddaan akka horatame hubachuun danda’ameera.Carraa kanaanis Dubartootaa fi Dargaggoonni miliyoonotaan lakkaa’aman akka fayyadaman ta’uu isaaniitiin haqa qabeessummaa guddina diinagdee keenya daandii sirrii fi abdachiisaa irra jiraachuusaa mirkanaa’eera.Gama kanaanis qooda fudhattoota damee kanaatiif dhaabbanni keenya dinqisiifannaa qabu ni ibsa.

Aadaa fi seenaa ummata Oromoo gita bittootaatiin awwaalamee ture qabsoo aarsaa boonsaa dhaabbanni keenya kaffaleen waggoottan kudha shanan darban keessatti injifannoo ol’aanaa ummata Oromoo mataa ol qabachiise akka gonfachiifne yoo ibsinu seenaa bara baraan ittiin boonaa jiraannuu ta’uusaa injifannoo toora keenyaa akka ta’e mirkaneessuu barbaadna.Kanneen keessaa ol’aanaan guddina afaan Oromoo; sadarkaa afaan barnootaa ,afaan hojii mootummaa,afaan qorannoo fi qo’annooo,afaan saayinsii fi teeknolojii akkasumas miidiyaa akka ta’u gochuu dandeenyee jirra.Gama biraatiin ,seenaa ummata Oromoo bakka dhokatee turee ifatti ba’ee,afoolaan qofa osoo hin taane barreeffamaan dhalootaaf akka darbu gochuu eegallee jirra,halli mijataanis uumamee jira.

Kana bira darbee iddoowwan seena qabeessa seenaa ummata Oromoo wajjiin hiikkoo ol’aanaa qaban xiyyeeffannaa ol’aanaa itti kennuudhaan,misoomsuudhaan seenaa bara baraan yaaddannuu fi siidawwan dhalootaa dhalootatti darbu ijaaruu dandeenyee jirra. Carraa kanaan Maanguddota Oromoo itti fufinsa seenaa kanaatiif shoora isaanii gumaachaniif,Hayyoota Oromoo ga’ee isaanii taphatanii fi dhaloota haarawaa abbaa carraa kanaa ta’eef gammachuu ol’aanaadha jennee amanna.

Dhaabbanni keenya seenaa haarawaa kan birootiifis fakkeenya ta’e raawwate keessaa:Yeroo jalqabaatiif Miidiyaa Naannoo keenyaa ijaaruudhaan tokkummaa fi waalta’uu afaan ummata Oromoo dagaagsuudhaan,odeeffannoo waqtaawaa akka argatu biyyaa fi addunyaadhaan walitti akka hidhamu,guddina hawaasa kenyaatiif akkasumas misoomaaf akka kaka’u, muuxannoo akka wal jijjiiru,gochuu keessatti Miidiyaa ergama misoomawaa qabu hundeessuudhaan hojii fakkeenyummaa qabu kan rawwanne ta’uu isaa hubatamuu qaba.injifannoo guddaa kanaaf kanneen gumaachan:ogeessota Miidiyaa fi komunikeeshiniitiif Dhaabbanni keenya kabajaa ol’aanaa qabu ibsuu barbaada.

DH.D.U.O’n milkaa’ina hojii isaa yeroo qoratu hunda,ka’uumsi isaa hojii darbee fi injifannoo darbeen boonee dhaabbatee isuma faarsuuf osoo hin ta’in hiikkoo fi iccitiin injifannoowwan kanneenii qabsoo fuula duraa keessatti ga’ee isaan qabanii fi hanqinoota mudatan irraayis akka mana barnootaatti irraa barate boqonnaa itti aanuuf of qopheessuun aadaa isaa akka ta’e ni hubachiisa.

Yoomiyyuu taanaan ka’uumsa injifannoowwan keenyaa yeroo xinxallu, Tokkoffaa sirrummaa tooraa fi kaayyoo qulqulluu fi ifa ta’e jalqabaa fi dhumni isaa faayidaa Ummata keenyaa ta’e qabaachuu keenyaan,hooggansaafi miseensa toora kanaaf abboomee kutannoodhaan qabsaa’ee aarsaa ta’u horachuu keenyaafi aadaa fi dudhaa dimokiraatawaa yeroo yeroodhaan rakkoo keenya sakattaanee sirreeffachuudhaaf qophii ta’uu keenyaan akkasumas iddoo gufuun nu quunname hundatti dafnee amala sirreeffachuu qabaachuu keenyaan akka ta’e hubachuu dandeenyee jirra.

Hundaa olitti immoo Ummata yoomiyyuu toora misoomaa fi dimokraasii kan ofii godhatee fi amala keenya hubatee,yeroo cimnus ta’ee yeroo laafnu akka ijoollee isaatti nutti dheekkamaa nu guddisee fi aangoo isaa nuuf kenne akka qabnuu fi yoomiyyuu taanaan faaydaa isaa akka eegsifnuuf abdii nurraa qabu qabaachuu keenyaan akka ta’e amantaa guutuu qabna.

Kun kana ta’ee osoo jiruu Dhaabbanni keenya,DH.D.U.O’n qormaatilee gurguddoo imala haaromsaa dheeraa kana keessatti nu qunnaman yoo xiinxallu ammoo akka diinotaa fi masaanonni keenya “Dhaaba kufuuf deemu!” jedhanii qoosan osoo hin taane, haala saayinsaawaa fi dhugaa qabeessaa ta’een xiinxaluudhaan kallattiiwwan gurguddaa furmaata isanii ifaan kaa’uu dandeenyee jirra.

Akkuma beekamu qabsoo imala haaromsaa,woggoottan kudha shanan dabarsine keessatti hanqinoonni nu mudatan mataan isaanii rakkoole hojii keessatti nu qunnaman qaama qabsoo keenyaati malee rakkoolee toora keenyaa akka hin taane jala sararuudhaan rakkoolee kanneenis irraa barannee fi sirreeffannee injifannoo boqonnaa haaromsa keenya hundeedhaan lafa qabsiisuutiif bu’uura cimaa tokko godhannee ka’uudhaaf waliigalteerra geenyee jirra.

Rakkoolee hunda keessaa inni ijoo jennee amantaan addaan baafne keessaa:-rakkoo ilaalchaa toora aantummaa ummatummaa fi kaayyoo worraaqasa dimokiraasii qabannee kaane osoo jiruu ilaalcha ufittummaa sadarkaa sadarkaan nu keessatti dagaagaa dhufee irraa kan ka’e akkaataan aangoon ittiin ilaalamu aangoon meeshaa hiyyummaa keessaa ittiin baasanii fi fayyadamummaa Ummataa sadarkaa ol’aanaattii kan ittiin mirkaneessan ta’uusaa dagachuudhaan dhawaataan madda jireenyaa, ummata dura ofiin jijjiiramuu fi aantummaa ummataa hanqisuun waan mul’ateef, amala aantummaa ummatummaa keenyaa irratti hanqinoota mul’atan sirreessuudhaan dafnee iddoo keenya uumamaatti deebi’uu qabna ijjennoo jedhuun waadaa qabsoo keenya ni haaromsina.

Ummatni Oromoo yoomiyyuu taanaan hanqinoota kanneen keessa yeroo galletti injifannoowwanii fi bu’aawwan galmaa’an madaallii isaaniitiin beekkamtii kennee hanqinoota mul’atan yeroo osoo hin kennin,xiyyeeffannaa ol’aanaadhaan akka sirreessinu kan barbaadu ta’uusaa ni hubanna.Amala warraaqummaa duraan nurratti beeku yeroo hanqisnu komii fi dallansuu akka nurraa qabu bifa adda addaatiin ibsachuu isaa kabajaa fi miira aantummaatiin fudhannee dafnee bobaa ummata keenyaatti deebinee fi dhiifama gaafannee fedhii misoomaa fi bulchiinsa gaarii isaa tumsasaa adda hin cinneen akka galmaan geenyu amantaa guutuu qabnuun mirkaneessuu barbaadna.

Gama biraatiin rakkoolee bulchiinsa gaariifi hojii dhabummaa Baadiyyaa fi Magaalaa keessatti mul’atan kallattii lamaan akka ta’an ilaallee jirra.Inni duraa sababa qabsoo fi toorri haaromsaa keenya hawaasa fedhiin isaa dabalee fi dheebuun misoomaa fi jijjiiramaa addaan hin citne uumameen hanqinoota humna raawwachiisummaa nu mudate irraa kan ka’e fedhiisaa akka hawwutti guutamuu dhabeef komii yoo qabaateyyuu,ummanni keenya rakkooleen kun dhimma yeroo yoo ta’e malee tumsa isaatii fi qabsoo keenyaan akka hiikuu dandeenyu akka nu hubatuu fi obsaan nu eeggatu kabajaa ol’aanaadhaan gaafanna.

Rakkoolee raawwii keessoo keenyaatiin hanqinoota bulchiinsa gaarii gaagga’ama ummata keenya qunnameef kabajaa ol’aanaadhaan Ummata keenya dhiifama gaafannee qabsoo ol’aanaa keessoo keenyaa fi tumsa ummata Oromoo baldhaatiin hojjennee akka kiisuunuuf waadaa keenya ni haaromsina.

Gufuuwwan biroo,rakkoolee keessoo keenyaa fi hanqina keenyarraa kan ka’ee ololaa fi gocha badii humnoota diinotaa fi masaanota keeenyaan Naannnoo keenya keessatti iddoowwan murtaa’an keessatti rakkoolee nageenyaatiin lubbuu namaa fi qabeenyaarra miidhaa ga’eef gadda guddaa nutti dhaga’ame ibsuudhaan yaalii humnootni badii sirnicha hundeedhaan diiguudhaaf, injifannoowwan keenya duubatti deebisuuf wixxirfannaa isaan godhaniin ummatni keenya akka yaaddoo keessa gale hubachuudhaan qabsoo cimaa hirmaannaa ol’aanaa ummata keenyaatiin rakkooleen kun iddoo ga’anitti akka dhaabbatan,akkuma aadaa keenyaatti rakkooleen kamiyuu maree ummataatiin hiikuu akka qabnu kutaalee hawaasaa hundaaf waamicha wal irraa hin citne ni dabarsina.

Ergamni humnoota diinaa ammoo diigumsa sirnaa fi biyyaa isaan qaban akka hin milkoofne gochuudhaaf gama keenyaan aarsaa qabsichi gaafatu akkuma kaleessaa kanfaluudhaan, keessoo keenya gadi fageenyaan haaromsinee kan qabsoofnu akka ta’ee fi tumsa ummata Oromoo barame ni gaafanna.

Humnootni farreen nageenyaas jeequmsaan karaa qaxxaamuraan fedhii taayitaa qabachuu yoomiyyuu milkaa’uu akka hin dandeenye hubatanii jeequmsaa fi gochaa shororkeessummaa isaaniirraa akka of qusatan irra deebinee akeekkachiisuu barbaanna.

Dhumarrattis dhaabbanni keenya haaromsa gadi fageenyaa dhugoomsuudhaan gaaffiiwwanii fi fedhii misoomaa fi nageenyaa ummata keenyaa hundeerraa qabsaa’ee hiikuudhaaf qophii ta’uusaa ibsaa,murteewwanii fi ijjennoo kanatti aanee jiru dabarsee jira.

1ffaa.Dhaabni keenya sababoota alaa kamiyyuu dura keessoo isaa haaromsa gadi fageenyaan gaggeessuudhaan hirmaannaa Ummataa fi tumsa ol’aanaa caasaa keenyaatiin keessoo keenya qorannee qulqulleessuudhaan,dhaaba keenya daran cimsinee aantummaa ummata keenyaatti deebinee qabsoo finiinsuudhaan faayidaa fi mirgoota ummata Oromootiif akkuma kaleessaa hunda kutannoodhaan qabsaa’uudhaaf qophaa’ummaa keenya ni mirkaneessina!!

2ffaa.Dhaabbanni keenya ,DH.D.U.O’n akkaataan taayitaa ittiin madaalu,taayitaan meeshaa faayidaa ummataa ittiin mirkaneessinu ta’uusaa amantaa qaburraa ka’uudhaan, akkasumas haaromsa keenya sadarkaa ol’aanaatti ceesisuudhaaf akka nu dandeessisu kutannoo fi aantummaa ummataa hanga ofirratti murteessuutiin ibsamuun hoggantooni ol’aanaan dhaaba keenyaa itti gafatamummaa isaanii irraa fedhii isaaniitiin gad lakkisuudhaaf gaaffii KGGtiif dhiyeeffataniin,dura taa’aa fi itt aanaa dhaabaa irraa gadi lakkisuudhaaf gaaffii kan dhiyeeffatan KGG murtee kana miira itti gafatamummaa ol’aanaatiin xiinxalee mirkaneessuudhaan bara,hooggananitti gummacha qaban yaada keessa galchuudhaan miseensa koree hojii raawwachiistuu ta’anii,sadarkaa tokko gadi buusuudhaan akka qabsaa’an murteessuudhaan iddoo isaanii dura taa’aa fi itti aanaa dhaabbatichaa haaraa boqonnaa qabsichaa kana hogganuudhaan fuldura deemsisuu danda’an bakka buuseera.

3ffaa Rakkoo gaggeessummaa keenya irraa maddan gadi fageenyaan sakatta’uudhaan ijaarsaafi gurmaa’insa cimaa dhaabaa fi mootummaa mirkaneessuudhaan gaggeessummaa boqonnaan qabsichaa gaafatu kennuudhaaf sadarkaa sadarkaadhaan fedhii hawaasa keenyaa guutuudhaaf qophaa’ummaa keenya ni mirkaneessinaa.

4ffaa.Rakkoolee bulchiinsa gaarii jireenya Ummata keenyaa guyyaa guyyaan danqanii qaban addaan baasuudhaan,sadarkaa isaanii fi walduraa duubaan yeroo gabaabaa,giddu galeessaa fi dheeraa jedhamu keessatti hiikamuu qaban hirmaannaa fi miira abbummaa ummataatiin hiikuudhaan,ilaalchaa fi gochaalee kiraa sassaabdummaa qabsoo tokkummaa keenyaa fi araarama tokko malee moo’annee ilaalchi Misoomawaa toorri haaromsa keenyaa akka milkaa’u qabsoo obsa fixachiisaa ni goona.Kanaafis tumsa keessan barame ni gaafanna.

5ffaa.Sochiin haaromsa keenya dhimma halkan tokkoon sadarkaa yaadamu irra akka hin geenye ni hubatama.Haaromsi dhimma adeemsaa fi itti fufinsaan galma barbaadame ga’uu qabu ta’uun isaa beekamaadha. kanaafuu haaromsa keenya hundeedhaan gadi fageessuu dhaaf ammoo,gaggeessaa fi miseensota baldhaa akkasumas ummata baldhaa bira ga’ee jijjiirama bu’uuraa fiduudhaaf yeroo osoo hin kennin akka hojjennuufi milkaa’ina haaromsichaatiif ga’een hunda keenyaa ol’aanaa waan ta’eef har’as akkuma kaleessaa miira abbummaatiin akka tumsitaniifi obsa adeemsi qabsichaa gaafatu hubachuudhaan nu cina akka dhaabbattan waamicha keenya ni dabarsina.

6ffaa.Tokkummaa keenya cimsuudhaan akkuma fayyadamummaa keenya dhugoomsinutti Ummattoota biiyya keenyaa fi ollaa keenya wajjiinis walitti dhufeenya obbolummaa fi wal danada’uutiin akkasumas wal kabajuudhaan akkuma kaleessaa har’as irree keenya gamteeffannee duula farra hiyyummaa fi boodatti hafummaa waliin jalqabanne cimsinee itti fufudhaan galma ga’iinsa haaromsa biyya keenyaatiif ni tumsina.

7ffaa.Ijaarsa fi gurmaa’insa Ummataa fi dhaabbiilee Dimokiraasii cimsuudhaan hirmaannaa ummataa karaa ijaarameen kallattii hundaan dhugoomsinee hundee ijaarsa dimokiraasii lafa qabsiisaa gaabbisaa fi dagaagsaa deemuudhaaf hojiiwwan nu dandeessisan gadi fageenyaan raawwachuudhaaf qophaa’ummaa qabnu ni mirkaneessina.

8ffaa.Haala qabatamaa Naannoo keenyaatiifi guddina biyyi keenya irra geese bu’uura godhachuudhaan misoomni humna namaa keenya sadarkaa ol’aanaadhaa fi ariitiidhaan guddachaa dhufee jira.Haa ta’u malee humni baratee fi dargaggootni naannoo keenyaa sadarkaa barbaaddamutti fayyadamaa ta’uu dhabuusaaniitiin Maatiinis ta’ee dargaggootni keenya gaaffii fayyadamummaa haqa qabeessaa gaafachuu isaanii dhaabni keenya miira itti gaafatamummaa ol’aanaadhaan,amantaadhaan fudhachuudhaan rakkoolee kana hiikuudhaaf xiyyeeffannaa addaa fi ol’aanaa kennuudhaan hojjachuu fi hiikuu akkuma jalqabnetti daran cimsinee,baldhifnee fi tumsa ummataa,humnoota misoomaa hundaa fi dargaggoonni mataan isaanii kallattiidhaan akka hirmaatan gochuudhaan jijjiirama bu’uuraa fiduu akka dandeenyu amantaa guutuudhaan ibsaa, carraa kanaan dargaggoota Naannoo keenyaatiif tumsa isaan irraa eeggamu akka gumaachaniif waamicha dhiyeessinaaf.

9ffaa.Dhaabbanni keenya aantummaa ummatummaa isaa irraa kan ka’een dhimmoota gaaffii qonnaan bulaa deddeebi’anii ka’an keessumattuu sababa misoomaatiin lafa isaanii irraa ka’an gad fageenyaan qorachuudhaan fayyadamummaa isaanii sadarkaa ol’aanaatti mirkaneessuudhaaf caaseffamaa fi hojmaata cimaadhaan deeggarree rakkoolee kana dura raawwii keessatti mul’achaa turan bu’uuraan hiikuudhaan fayyadamummaa isaa ni dhugoomsina.Gama hojiirra oolmaa labsii liizii lafa magaalaatiin gaaffiilee qonnaan bulaa fi lammiileen sadarkaa sadarkaadhaan gaafachaa turan dhaabbnni keenya qoratee haala bu’uuraan seericha hin faallessineen kallattii gaaffiin ummataa karaa haqa qabeessaan deebii ittiin argachuu malu hojmaataa fi seeraan akka deebi’u haaluma murtaa’een hojiirra oolmaa isaatiif cimsinee ni hojjenna.

10ffaa.Rakkoolee walitti bu’iinsa daangaa yeroo yeroodhaan naannoo keenya mudatan kutannoo fi xiyyeeffannoo addaatiin qaamota dhimmi ilaalu wajjin ta’uudhaan hundeedhaan akka hiikaman gochuudhaaf kan yeroo kamiyyuu olitti akka hojjannu ibsaa,Ummatni keenyas rakkoolee yeroof qunnaman kamuu karaa tasgabbii qabuun,karaa nagaa fi qabsoo seera qabeessaan hiikuudhaaf obsaa fi bilchinaaan akka tumsa gootaniif waamicha keenya ni dabarsina.

11ffaa.Nageenyi waan hundaaf bu’uuraa fi utubaa ta’uu isaa ummata keenyaa ol namni beeku jira jedhanii yaaduun hin danda’amu.Hundaa ol rakkoolee keenya gadi teenyee hiiknee fi fooyyessuudhaaf guddina Hawaasni hundi sadarkaadhaan irraa fayyadamu dhugoomsuudhaa fi kan qabnuu fi kan hedannuttis fayyadamuudhaaf dhimmi murteessaan nageenyadha.Haa ta’u malee humnootni badii fi faallaa Heera Mootummaa keenyaa lallabniifi waamichi isaanii alaafi keessaa walitti hidhatanii nagaa fi tasgabbii nu dhoorguudhaan fedhii qaxxaamuraan aangootti dhufuu isaanii milkeessuudhaafi abiddi saafaan akka qabatu gochuudhaan gufuu misoomaa fi nageenya keenyaa ta’uu filatanii jiru.Dhaabbnni keenya DH.D.U.O’n garuu yeroo kamiyyuu diinni ol’aanaa keenya hiyyummaadha,kan isarraa hafe ammoo humnoota nageenya keenya booressuudhaan hiyyummaa keenyarratti akka hin duulle nu taasisan fi gufuu nutti ta’aniidha.Darbees humnoota humnaan heera mootummaa diiguudhaan aangoo karaa qaxxaamuraatiin qabachuu barbaadaniif ummatni hayyama akka hin kennineef qabatamaadhaan mirkaneessee jirra.

Kanaafuu ummatni keenya sadarkaa hundatti wareegama guddaa kanfaluudhaan qaamota nageenyaa fi mootummaa wajjiin dhaabbatee fi adda durummaadhaan nageenya naannoo isaa kabachiisuudhaaf tumsa taasiseef dinqisiifannaa fi galata ol’aanaa galchinaaf.Kana boodas dhimma murteessaa jireenya keenyaaf bu’uura ta’e, Nageenya keenya akka hin boorofnee fi badii lubbuu namaa fi barbadaa’uu qabeenya keenyaa akka iddoo amma irra ga’etti dhaabsifnu sochiin misoomaa keenya cimee akka itti fufu ummata keenya wajjiin harka wal qabanneei akka hojjennu qophaa’ummaa keenya ibsaa ummata keenyaaf ammas daballee waamicha dabarsinaaf.

12ffaa.Akkuma Nageenya naannoo keenyaa mirkaneessuun dhimma murteessaa ta’e hundaa ol’aantummaan seeraa jiraachuun nageenya lammiileef wabii ol’aanaadha.kanaafuu hirmaanaa baldhaa Ummata keenyaa fi qaamota nageenyaa fi haqaa cimaadhaan harka wal qabannee ol’aantummaa seeraa mirkaneessuudhaan,lammiin hundi sodaa tokko malee miira xiiqii ol’aanaatiin hojii misoomaa fi ijaarsa sirna Dimokiraasii galmaan ga’uudhaaf akka tumsitan waamicha keenya ni dabarsina.

Dhuma irratti milkaa’inis Haaromsa keenyaa hundeedhaan akka lafa qabatu gochuu keessatti hunda dura caasaan keenya qophaa’ummaa ol’aadhaan akka raawwatuu fi raawwachiisu, dabalataanis ummanni sadarkaa sadarkaadhaan jiru hundi akkuma kanaan duraa gahee isin irraa eeggamu sadarkaa ol’aanaadhaan bahachuudhaa fi tumsa ol’aanaa akka gootan akkasumas haaromsicha hundeen akka lafa qabatuu fi fayyadamummaan ummata keenyaa sadarkaa ol’aanaadhaan akka dhugoomu,akka tumsitan waamicha ol’aanaa isiniif dabarsina!!

Koree Giddu Galeessa- Dh.D.U.O

FULBAANA 11 ,2009

ADAAMAA