Ibsa Ijjannoo Yaa’ii dhaabbatummaa ODP

Ibsa Ijjannoo Yaa’ii dhaabbatummaa ODP

Hirmaattota Yaa’ii dhaabbatummaa 9ffaan qophaa’e

----

Barri isaa fagoodha yaadannoon isaa ammoo dhiyoodha DhDUO

kaleessaa, ODP hardhaa imala waggoota darbanii keessatti daandiin irra

darbe kan injifannoon baayyeen itti galmaawan tahullee gufuuwwan isa

mudataniis salphaa miti.

Yaa ta’u malee duudhaan dhaloota isaarraa qabee Oromummaan

dagaagfataatiifii qajeeltoo jireenya isaa godhachaa dhufe kufanii ka’uuf

halaalatti quba qabuun dura quba ofitti qabanii of dhaggeeffatanii ofitti

deebi’uun of ceepheessaa of haaroomsaa deemuudha.

Seenaa kufanii ka’uutiif kan akka dubbii hanqaaquu yookiin killee caphaan

alaa dhuftu du’a, caphaan keessaa futtaatu lubbuu akka taatee rakkoofii

gaaga’ama hamaa hamma Ummanni Qabsoofnuuf duugda nutti gara galuu

gahee turee yaadannoo yeroo dhiyooti.

Paartiin keenya Qabsoo keessoo isaatti karaarraa maqnee karatti yaa

deebinuu taasiseen bu’aan harra naannoo keenya bira dabree biyyaaf ifuu

eegale nu miseensa paartii kanaaf qofaa miti kan biraatiifuu baruumsa

guddaa kan laatuufiidha.

Qabsoo Ummata Oromoo shiraaf dabaan moggatti dhiibamaa ture

walakkatti fiduun paartii ajandaa namaa baadhatee raawwatu otoo hin tahin

ajandaa ofii isaa bocuun sochoowu uumuun danda’amera.

Harra wa’aadaa isaa dhugoomsee maqaan gamatti gochaan jijjiiramee

gaachana nuu ta’e.

Imalli siyaasa jibbaa Falaasamna siyaasaa tokkummaa, jaalalaa, dhiifamaafi

ida’amuu gaggeessaa paartii keenyaa keessaa dhootee bahuun

tarkaanfachiifameen paartii lubbuu qabuufii lammitti lubbuu horee qalbii

miliyoonotaa booji’uun tokkummaa biyyaaleessaatiifuu wabii tahuu danda’u

ta’era.

Duudhaan sirna Gadaa Sabboonummaa Oromummaa dagaagsinee

Itoophiyaawummaa ittiin ijaaramtuufii dimokiraasiin itti dagaagu akka tahe

qabatamaan akka mullatu tahe.

Rakkoon kalaeessa nu mudattees taatu tan arra qarqabatti nu galfachuuf

nutti aggaamtu kamuu yoo muuxannoo xiiqii injifannoo caaluuf nu

qopheessite malee nu hin gufachiiftu, sababiin isaa muuxannoo keenyaatu

muuxannoo risaati, dhugaaf haqaaf ilkaan qarree haarawoomnee

tokkummaa Oromummaa bu’ursinee, Oromummaatti deebinee Oromummaa

kabajchiifnee utubaa biyyaa goone Itoophiyaa itti ijaarra .

Yaa’iin keenya 9ffaan dhaadannoo “Yaada moo’ataa injifannoo caalmaaf”

jedhuun gaggeessine kun ciminaaf hanqina,rakkoof fala isaa

kaayee,hirmaannaafii fayyadamummaa diinagdee haqa qabeessummaarratti

kallattiin taa’e, filannoon hooggansa kutannoo, haqaafii beekkumsarratti

hundaawee gaggeeffame, walumaa galatti murtoowwan gurguddoon

darban Miseensa keenyatti abdii horee xiiqii toora paartii kootii qabadhee

waan hunda irra aanee injifachuu niin danda’a jedhu kan uumeedha .

Yaa’ii keenyaan yaad-rimee ijaarsa sirnaa keessoo dhaabaafi Demokraasii

lafa qabsiisuun ummata nu abdate warra abdii guutu taanee quuqqama

isaa quuqqamneefii rakkoo isaa furree hamileen jijjiiruuf hojiin heegaree

miidhagsuuf xurree nuu banu millachuu danda’era.

Magaaloonni keenya kan dirra ballatanii hiyyeessa buqqisuun boochisan,

harka yayyii keessaa arba qoqoree jigsuu barbaaduun kan abbaa cubbuu

coomsan otoo hin tahin giddu gala jireenya ammayyaa, gabaafii industirii

carraa hojii baballaa uumanii akka tahaniifiis yaa’iin nu warra abbaa qalbii

hojiin guddaan nu eeggatuuf hojii manaa qalbii keessa nu kaayee jira.

siyaasa hooggannee fayyaa faayoomsina, rakkoo kamuu furaa karaa

dabaafii gadadoo irra aanna yoo jennu garuu hawwii duwwaan otoo hin

tahin beekkomsaan tahuu qabaas qalbifannee jirra.

Kanaaf dhimmi jaarsa dandeettii, misooma qabeenya humna namaafii

saayinsiifii teeknooloojii dhimma murteessaa boqonnaan qabsoo irra

geenye nu gaafatu tahuu otoo hin dagatin heeraaf seeraan wal ammarra,

heeraaf seeraan biyya bulchina, heeraaf seeraan haqa keenya falmannee

nageenya dhala namaa hundaaf kutannee hoojjanna.

Kanaaf Yaa’ii Paartii keenyaaf yeroo seena-qabeessa ta’eefi akka haaraatti

bakka ka’uumsaa godhannee ummata keenya ballaa itti sosochoofnu

jannee abdanne kun qabsoo sirrii heegeree keenya murteessan kan itti

kaawwanne ta’uu isaa waliigaluudhaan ibsa ijjennoo abbaa qabxii 9

qopheeffanneerra.

Qaphxiiwwan ibsa jijjannoo hirmaattoota Yaa’ii 9ffaa

1.Kaleessa yoo hooggansi keenya mirga ummata Oromoof eelee

dhamaloomterra dhaabbatee falmu dhaabaa dagalee taanee keessoo

dhaabaa keenya cimsuu caalaa ilaalchaan makannee gariin keenya yoo

xiiqeeffannu, gariin keenya fakkeessaa, gariin keenya ammo busheessaa

taanee duudhaa dhaabaafii Ummata keenyaallee gannee turre.

Kana booda Maqaa miseensaan daldaluun,xawalwaallummaafii bakka lama

ijjachuun ODP keessatti iddoo hin qabaatuu obsaaniis bira hin darbamu.

Kanaaf nu hirmaattoonni yaa’ii dhaabbatummaa 9ffaa ODP hanqina

siyaasaa keenya beekkomsaan guuttachaa keessoo dhaaba keenyaa

qulqulleessuufii cimsuuf wa’aadaa ni seenna.

2.Akka dhala Oromootti wal-cimsinee sabboonummaa Oromummaa

dagaagsuun wal ijaaruu caalaa karaa walitti cufuuniifii waljibbinee deemsi

deemne walitti nu hammeesse malee walitti nu hin finne, dirree walitti

dhiphisne malee yaadaan wal hin moo’anne, kan nu ajjeesuuf dabarsinee

wal kannine malee akka ilmaan abbaa gadaa taanetti dahoo walii hin taane.

Kana booda garuu maqaa Oromoon daldalaa Oromoo waliin ficisiisuufii

gidiraaf saaxiluun akka hin danda’amnees ifatti labsame jira.

Kanaaf, nuti hirmaattoonni yaa’ii 9ffaa aadaa siyaasaa dulloomaa kana

guutumaan guututti keessa keenyaa gatuun, aadaa siyaasaa ammayyaa’aa

wal-dhaggeeffachuu, yaada moo’ataa maddisiisuu fi mariif dhiyeessuun

karaa tokkummaan Oromoo itti cimuu danda’urratti xiyyeeffannaa

guddaadhaan hoojjechuuf wa’aadaa ni galla.

3.Fayyadamummaan diinagdee ummata keenyaa keessattuu

dargaggootaafii dubartootaa guddatee qabeenya uumamaa keenya hunda

diinagdetti jijjiirrree biyya lammiin karaa sirriifii seeraa qofaan qabeenya itti

horatee hiyyummaa itti moohatu uumuuf injifannoo gama siyaasaan

gonfanne diinagdeeniis dabluuf nu hirmaattoonni yaa’ii dhaabbatummaa

9ffaa kallattii toora dhaabni keenya kaa’urra fullaanee faayiddaa diinagdee

ummata keenyaa mirkaneessuun warraaqsa diinagdee finiinsuuf

kutannoodhaan hoojjachuuf irra deebinee wa’aadaa ni galla!!!!

4. ODP akkuma kaleessa mirgaafii walqixxummaa sabaafii sablammoota

biyyattiif aarsaa kafale harraas saba ballaa Oromoofii sabaaf sablammoota

biyyattii waliin tahee gochoota toora paartiirraa maqan saaxilaa,irrattiis

qabsaawaa biyyi akka biyyaatti akka itti fuftu halkanii guyyaa hoojjechaa

jira.

Ummanni Oromoos aadaan hammachuu,jaalalaan moohachuu, wajji

jireenyaafii wal danda’uu sabaafii sablammoota akkanumaas ummattoota

biraatii waliin qabu cimsatee akka itti fufu

nu hirmaattoonni yaa’ichaa Kabajniifii wajji jireenyi Obbolummaa Duudhaa

hundee ummanni Oromoo ummatoota biyyattii waliin qabufii biyya ijaaruu

keessatti ga’ee qabu akkuma kaleessaa cimsee akka itti fufuu qabu yeroo

kamiyyuu caalaa kutannoo cimaadhaan ni hoojjanna!!!!

5.Siyaasni keenya kan galma ga’u, hoomishnee calleeffannee rakkoon

bulchiinsa gaariis furamuu kan danda’u olaantummaan seeraa kabajamee

nageenyi yoo mirkanaawe qofa

Daldaltoonni siyaasaa karaa adda addaan abdiin harra mullate isaan

miidhuufi gufachiisuu barbaadan kana booda sakandii tokkoofuu akka hin

obsineefii tolaaniis tahe humnaan adaba qabsiisuu akka danda’u ijjannoo

cimaa paartiin keenyaafii mootummaan paartii keenyaan hoogganamu

fudhachaa jiru nu hirmaattoonni yaa’ii 9ffaa dinqisiifannaa olaanaadhaan

ilaalla.

Kanaaf karaa badii nageenya keenya booreessu kamuu hadheeffannee

irratti qabsaawaa olaantummaa seeraa mirkaneessuuf kutannoo

cimaadhaan ni hoojjenna.

6. Sirni demokraasii hirmaannaa ummataa hin mirkaneessine fulla’iinsa

qabaachuu hin danda’u. Muxxannoo waggoottan imala haaromsaa

dabarsine irraa argannees yoo ijaaf gurra ummata itti ilaallee

dhaggeeffannee hirmaachisu qabaanne wanni dadhabnu kamuu akka hin

jirre baruumsa guddaa kan nuuf laateedha.

Waan ta’eefis, waan hoojjennu kamirrattuu abbaa hoojjennuuf ummata

keenya maaliif akka hoojjennuufii yoom akka hoojjennu iftoomina uumnee,

ummata keenya hirmaachisaafii fayyadamummaa isaa mirkaneessaa

deemuuf wa’aadaa ni galla!

8. Adeemsa kana duraan hojii seenaaf tahu hoojjanne otoo of harkaa

qabnuu dhibeen siyaasaa fayyaa nu dhoorkaa wal afaan nu deebisaa wal-

nu nyaachisaa qoqoraaf karra bantee qa'ee nu onsaa turte ijoon takka

hanna karaa adda addaan raawwatamuudha.

Waan itti hin dafqine nyaachuun haraam, faayiddaaf haqa dabsuun,tajaajila

irrisuufii sobuun duudhaa Oromummaatii miti.

Hattuun saba hin qabdu, faradduun amantaa hin qabdu, dabsituun haqaa

gosa hin qabdu, xawalwaalleefii waliin dhooftuun kabaja hin qabdu,

kanaaf nu warra saba guddaa kanarraa dhalatee saba guddaa kanaaf

hoojjechuuf haarawoomneef hannaaf malaammaltummaan kana booda

paartii keenya keessatti iddoo waan hin qabaanneef ofii irraa qulqulloofnee

dhaloota gocha hamaa kana balaaleeffatu horachuuf wa’aada ni galla.

9. Kana booda hamma ida’amnee jaalalaan moo’annee caallee argamnetti,

daandii keenya Oromummaa,Oromoon Oromiyaafii biyya itti jaarrurraa wanti

of booda nu deebisu hin jiraatu

Yaa’ii keenya Boqonnaa qabsoo haaraa irra geenyeeniifii hojii guddaa

injifannoo caalmaaf hoojjennuun Oromummaa Quxusuun hangafa kabajuu

nu barsiiseen hangafoota keenya kabajaafii galataan gaggeeffannee

hooggansa haaraa jijjiirama kana itti fufsiisuu danda’an beekkomsaafii

iftoominaan filannee jirra

Kanaaf nuti hirmaattoonni yaa’ii 9ffaa hooggansi haaraan Mootumnmaafii

dhaaba cimaa ijaaru jannee filanne Qajeelfama kaayyoo dhaabaafii

faayiddaa ummata keenyaa kabajchiisuuf nuuf dabarsan kamuu amantaa

guutuun fudhannee hojiirra oolchuuf qophaawummaa cimaa kan qabnu

tahuu keenya irra deebinee ni mirkaneessina.

Injifannoon Ummata Oromoo tiif!

Kabajaafii Ulfinni Bara Baraa Jaallewwan Qabsoo Kanaaf wareegamaniif!

Fuulbana 11 Bara 2011

Jimma