Ergamtuun diina alaa wayyaaneen gatii ishii argachaa jirti

 

Fulbaana 05,2015 Finfinnee,(TW)Humnoonni alaa keessumattuu kanneen Itiyoophiyaan misooma diinagdeetiin akka hin guddanneefi akka quucartee haftu barbaadan yoomillee ta’u Itiyoophiyaan tasgabbiidhaan akka jiraattuuf gonkumaa hin barbaadan.Fedhiin isaan Itiyoophiyaa jeequuf qaban akka galma ga’uuf tooftaa kamittiyyuu fayyadamuudhaan Nagaan Itiyoophiyaa akka boora’u ummanni Itiyoophiyaa Nagaadhaan jiraatee hojii misoomaafi guddinaa irratti akka hin xiyyeeffanne taasisu.

Biyyi Misir ykn.Gibtsi jedhamtu Itiyoophiyaan guddina diinagdee akka hin galmeessifneef shiroota hedduu shiruudhaan hojiirra oolfachuu dandeessee jirti.Adda durummaadhaan kan ka’uu danda’us kallattiidhaan dhufuu utuu hin taane egamtoota baandaa ta’uudhaan biyya gananitti fayyadamuun badii lakkaa’amee dhuma hin qabne geessiftee jirti.

Itiyoophiyaan guddina diinagdee galmeessuu yoo dandeesse qabeenya uumamaa Lageen qabdu hidhuudhaan Bishaan Laga Abbayyaa gara ishiitti akka hin yaane taasisuudhaan numiidhu dandeessi jechuun qondaaltoonni biyyattii rakkoo of ittummaa ol’aanaa keessa waan jiraniif sochii guddinaa Itiyoophiyaan taasiftutti gufuu ta’aa turaniiru.Gufuun isaan uuman ammas akkuma itti fufetti kan jiru ta’uunsaa ni beekama.

Dhiibbaan Gibtsi Itiyoophiyaa irratti taasiftu waggoota kudhanii asitti daran dabalee jira.Sababiin guddaan hidha guddicha haaroomsa Itiyoophiyaati.Ijaarsi hidha kanaa gufatee akka hafuuf qondaaltoonni Gibtsi waan danda’an hunda raawwataniiru,gadi bu’aniiru, ol ba’aniiru.Hojiiwwan diippiloomaasii bu’aa argamsiisuuf hedduu hojjetaniiru.

Gibtsi keessumattuu waggoota afurii asitti diigumsa Itiyoophiyaa irratti xiyyeeffachuudhaan sochii bal’aa taasiftee jirti.Garee shororkeessaa TPLF taayitaa Itiyoophiyaa bulchuu irraa qabsoo ummataatiin waggoota afuriin dura fonqolfamuuf dirqametti fayyadamuudhaan Itiyoophiyaan Nagaa waaraa akka dhabdu,hojiiwwan misoomaafi guddinaa irratti xiyyeeffachuu akka hin dandeenyeef gufuu taatee jirti.

Garuu qondaaltoonni Gibtsi kanaan duraas ta’an kanneen amma jiran hammeentaa barbaadaniin bu’aa garaa isaan ga’u galmeessisuu hin dandeenye.Amma gara abdii kutachuutti waan dhiyaatan fakkaata.Keessumattuu guutiinsi  Bishaanii marsaa 3ffaa Hidha Guddicha Haaromsa Itiyoophiyaa milkaa’inaan erga xumuramee booda xiqqoo adabachuu hin ooltu.Shirri karaa ergamtoota ishiitiin raawwattu garuu sochii gareewwan shororkisitoonni taasisaniin akkuma itti fufetti kan jiru ta’uunsaa ni beekama.

Diinoonni Itiyoophiyaa dhiyoofi fagoo irra jiran wayita kanatti biyya keenya Itiyoophiyaa irratti maalif akka xiyyeeffatan hubachuun barbaachisaadha.Itiyoophiyaan teenya kanaan dura bittaa koloneeffannoo humnoonni alaa barbaadan gootummaadhaan ofirraa qolachuudhaan ardii Argrikaatiif fakkeenya taate.Ummata gadaantummaadhaan humna alaatiif bulu hin qabdu.Ummanni Itiyoophiyaa hooggansa cimaa yoo argate ammoo biyyasaa tajaajiluuf wanti qusatu tokkollee hin jiru.Haqa kana diinoonni Itiyoophiyaa sirritti xiinxaluudhaan beeku.

Waggoota afuriin duratti wayita wayyaaneen Itiyoophiyaa bulchaa turte Nagaan Itiyoophiyaa akka hin boorofneef biyyaaleen lixaa deeggarsa ol’aanaa taasisaa turan.Keessumattuu gochoota shororkeessitootaa ittisuuf deeggarsa qabatamaa akka taasisaan turan beekamaadha.Waggoota afran darban keessahoo maaltu taanaan warri lixaa harka deeggarsaa hiixachuu didan?

Hooggansa biyyaaf hojjetutu qabsoo cimaadhaan dhufe.Muummichi Ministiraa Dr.Abiy Ahmad taayitaa biyya bulchuu qabatan.Taayitaa erga qabatanii booda caasaan saamichaa wayyaaneen diriirsite akka kukkutamu taasisan.Caasaan saamichaa akka kukkutamu taasisuun ammoo daandiin saamichaa akka cufamuuf haala mijeesse.Sababa kanaan humnoonni alaa qabeenya Itiyoophiyaa saamuu baran xiiqii keessa seenan.Xiiqauudhaanis mala Dr.Abiy taayitaa irraa ittiin bu’u barbaadan.Fagoo hin deemne.Ergamaan isaanii wayyaaneen utuu jiruu maalif dhiphatuu?

Wayyaaneen keessa beekettiidha.Waggoota 27’f abbaa irree ta’uun Itiyoophiyaa bulchite.Waan hundumaa gochuu akka dandeessu beeku waan ta’eef wayyaanee abdatanii ergamtuu taasifachuun itti fayyadaman.Qondaaltoonni wayyaanee duruu baandaa waan ta’aniif akkaataa biyya ittiin gurguran beeku.Karoorfatanii ka’an.Kallattii adda addaatiin Nagaan akka boora’u taasisan.Ergamtoonni Gibtsiifi warra lixaa ergamtoota biyya keessaa qopheeffatan.Kanaaf ammoo adda durummaadhaan ABO-Shanee argatan.Yaabbatanii Oromiyaa keessa ittiin gulufuuf ABO Shanee kan caalu akka hin jirre duruu sirritti beeku.

Ergmaatu ergamaa argate.ABO-Shaneen ergamtuu wayyaanee ta’uudhaan Nagaan Oromiyaa akka boora’u hojiin misoomaa akka dhaabbatu taasifte.Qindoomina Shaneen wayyaanee wajjin uumteen qonnaan bultoonni Oromiyaa godinaalee gara garaa keessa jiraatan qotatanii jiraachuu dadhaban.Namni biyyum isaa keessatti nagaadhaan ba’ee nagaadhaan galuu dadhabe.Shitaan dhokattee miidhaa geessiftu iddoo adda addaatti bosona keessa dhokachuudhaan ummata bal’aa miite.

Miidhamni ummataa kun akka dhaabbatuuf hooggansi Itiyoophiyaa amma jiru carraaqqii hin qusatamne taasiseera.Ummata shiftoonni iddoo jireenyaa irraa buqqisan qayee jireenyaatti deebisuu dabalatee rakkooleen mudatan hundumtuu fala akka argataniif sochiin bal’aan taasifameera.Kanaanis jiraattoonni kumaatamaan lakkaa’aman qayee diinni irraa buqqisetti deebi’uudhaan jiraachuu jalqabaniiru.

Amma ergamtuun diina alaa wayyaaneen gatii ishii argachaa jirti.Shira shirtuun hanga tokko bu’aa waan argatte itti fakkaatee irra deddeebiidhaan Naannoo Amaaraafi Affaar weerarte.Fulbaana 18 bara 2014 weerara marsaa 3ffaa erga raawwattee booda waan ta’aa jirtu,miidhaa irra ga’e dhaloonni Naannoo Tigraay waraana kaayyoo hin qabneen akka dhumaa jiru qabatamaan mul’ateera.Kana ammoo ibsa Getaachoo Raddaafi Taaddasa Warrada yeroo adda addaatti kennan irraa tilmaamuun haala qabatamaan jiru hubachuun waan nama rakkisu miti.

Ergamtuun diina keessaa ABO-Shaneenis barbadooftee jirti.Wixiffannaan bakka-bakkaa mul’ifu jira hin duune jechumaafi malee erga duutee turtee jirti.Shaneen kan duute wayyaanee diina ummata Oromoo ta’etti akka michoofte erga beeksifattee boodadha.

Reebicha cimaa Raayyaan Ittisa Itiyoophiyaa irraan ga’een Shaneen maqaa Oromoo balleessiteefi Saba Oromoo irratti miidhaawwan suukaneessaa ta’an geessifte amma gatii hin qabdu.Silaayyuu shitaan bosona keessa dhokachuudhaan riphxee miidhaa geessiftu gatii maal qabdii?Kanneen bosona keessa luuxuudhaan waan jiran of fakkeessanis qulqulleeffamaa jiru waan ta’eef ergamtuun diina alaafi ergamtuun diina keessaa ammaan booda bu’aan galmeessifachuu danda’an hin jiru.

Ergamtoonni lamaan Itiyoophiyaa diiguu akka dhadhaban wanti qabatamaan mul’isu shororkeessaan alaa al-Shabaab karaa Naannoo Sumaaleetiin gara Itiyoophiyaa akka seenuuf carraaqqii taasifamedha. al.Shababis gatii isaaf malu argachuudhaan akka deebi’e ni beekama.

Amma diinoota alaatiif maaltu wayyakaa?Akkam ta’uudhaan Itiyoophiyaa jilbiinfachiisuu danda’uu?Wayyaaneen itti abdatan jalaa rukutamaa jira.Inumaatuu lubbuun keessaa ba’uuf wixiffachaa akka jirtu kunoo qabatamaan mul’ateera.Watwaata qondaaltoota wayyaaneetu haala qabatamaan jiru mul’ise.Mootummaan Itiyoophiyaa birmadummaa biyyaa irratti qoosaan hin jiru adabadhaa jechuun tarkaanfii duuba deebii hin qabne fudhachaa jira.Gobi dawwee!Waan dubbiftaniif fayyaa ta’aa! Yaada kennuuf email:brehuri1@gmail.com