Muuxachuun Bofa du’a hin oolchu!

Biyya keenya keessa Ilaalchawwan diigumsa lalisan baay’eetu jira.Tibba darbe keessa gamaa gamanaa wal iyyaafachuu ilaalchawwan badiitiin waan ta’e  argineerra.Ilaalchawwan Of tuulummaa kan Dhiphummaafi Mankaraarsitummaa akkasumas ilaalchi kiraa sassabdummaa wal tumsuudhaan waan gochuuf karoorfatan hunda ijaan agarree,gurraanis dhageenyeerra.

Humnoonni ilaalcha kanaan xaxaman Oromiyaa bal’oo jiddu gala jeeqamsaa taasisuudhaan taayitaa karaa seera qabeessaan filannoodhaan dhaban karaa seeraan alaatiin qabatanii gita bittaa haarawaa ta’uuf waan danda’an hunda taasisuudhaan wixiffataniiru.

Gochoota raawwataman keessatti humnoonni badii biyya keessa riphanii jiraniifi humnoonni biyyaalee alaatti baqatan waltumsuudhaan socho’uuf carraaqqii ol’aanaa taasisaniiru.Haa ta’uutii kan caalu humna ummata bal’aati waan ta’eef  humnoonni badii qindoomina uuman kun asiifi achii irraa wal waamanii wixiffatanis waan karoorfatanii ka’an galmaan ga’achuu hin dandeenye.

Carraaqqiin isaan Oromiyaa jiddu gala taasifachuudhaan jeeqamsa mudate sadarkaa guutuu biyyaatiin babal’isuuf taasisan hundi harkatti fashalaa’uudhaan Daaraa jalaa ta’ee hafe.

Egaa muuxachuun Bofa du’a hin oolchu!Keessumattuu humni dhiphaan maqaa Ummata Oromoo waamuudhaan waggoota lakkoofsisaa jiru ABO’n sochii kana keessatti waan muuxate itti fakkaachuudhaan hanga tokko carraaqeera.Namoonni biyya keessatti argamaniifi ilaalcha  ABO lalisan tokko tokkos abdiidhaan waan dubbachaa turaniifi gochaa turan dhimmicha gadi fageenyaan kan beeku  sirritti beeka.

Ilaalchi ABO qaamolee hawaasaa gara garaa keessatti kan faca’ee ture waan ta’eef Namni dhalataa Saba Oromoo ta’eefi ilaalcha kana irraa bilisadha jedhamee yaadamaa ture tokko tokkos ilaalcha dhiphummaa kanaan weereeramee raafamaa akka ture hubatameera.Haalli kun namoota dhaabbileefi manneen hojii mootummaa gara garaa keessatti hojjechaa jiran irrattis calaqqiseera.Kanneen ilaalcha kana baachuudhaan jeeqamsi Oromiyaatti mudatee ture akka babal’atuuf fedhii qabanis bakka bakka akka jiran beekameera.

Wanti hubatamuu qabu ilaalchi dhiphummaa yoomillee ta’u fayyadamtummaa Saba Oromoo kabajisiisuudhaan itti fufiinsa akka qabaatu taasisuudhaaf ga’uumasa hin qabu.Ilaalchi dhiphummaafi sabboonummaan dhiphummaa irratti hundaa’e diigumsa babal’isuudhaan ummanni keenya akka miidhamu taasisa.Kana ammoo kanaan dura qabatamaanaan arguun bira dabarree jirra.

Kanneenumti ilaalcha kana lalisanuu waa’ee faayidaa ilaalchi dhiphummaa argamsiisu irratti tokko lama jedhanii waan himan hin qaban.ABOn’ abbaa ilaalcha dhiphummaati.Namini abbaa ilaalcha dhiphummaa kana jajuufi jajjabeessuuf carraaqus diina Ummata Oromooti.

Diinni Ummata Oromoo kan biraa ilaalcha Of tuultotaati.Of tuultoonni waggoota hedduuf waan Saba Oromoo irratti raawwachaa turan akka Bofaatti muuxachuun itti deebisuuf fedhii  akka qaban sochii fakkeessuudhaan taasisaniin qabatamaan mul’isaniiru.

Humna dhiphaa ABOfi gareewwan dhiphootaa kanneen biroo wajjin walfuudhuudhaan Of tuultoonni biyya keessaafi biyya alaa waan Oromiyaadhaaf gaddan fakkaatanii kan isaan raawwachaa turan sirritti hordofneerra.

Asrrattis muuxachuun, Bofa du’a hinoolchu.Hanga danda’an wixiffachaa erga turanii booda humnoonni kun wayita ammaa mataa gadi qabataniiru.Egaa humnoonni kun qaawwaafi haala mijaawaa  argatan hundatti fayyadamuudhaan fuuldurattis wixxifachuun isaanii hin oolu.Kanaaf humnoota badii kanatti karra cufuudhaan mankaraarsitootaafi kiraa sassaabdoota munyuuqaa jiranis mataa gadi qabsisuun fayyadamtummaa Ummata keenyaa gama hundumaanuu mirkaneessuudhaaf socho’uun murteessaadha.