Qeeqni sirriin ofiifis biyyaafis tola

Itiyoophiyaan biyya sirna paartilee hedduu hordofaa jirtudha.Biyyi waggoota hedduudhaaf bittaa sirnoota abbaa irreetiin dararamaa turte kun wareegama qabsaa’onni ijoolleen cunqurfamtootaa lubbuu isaanii marartuu dabarsanii ittiin kennaniin haala mijaa’aa uumameen sirna paartilee heduu fedhiin qaamolee hundaa ittin eegamuufi kabajamu hordofuu erga eegaltee waggoonni kurnan lama caalan lakkaa’amaa jiru.

Akkaataa caaseffama sirna paartilee hedduu Itiyoophiyaan hordofaa jirtu kanaatiin turtii waggaa shaniitiin filannoowwan sadarkaa biyyaalessaa qofaan raawwataman shan adeemsifamaniiru.

Xiqqaatus guddatus filannoowwan kanatti paartiin biyya bulchaa jiru A.D.W.U.I.fi paartileen mormitoonni kaayyoo adda addaa qabatanii socho’an hirmaachaa turaniiru.

Filannoo waggaa  shan eeguudhaan adeemmsifamaa ture kana irratti lakkoofsi paartiiwwan filannootti hirmaatanii garaa garummaa kan qabu ta’ullee paartileen gara garaa filannootti hirmaachaa turaniiru.

Filannoo marsaa 5ffaa baatii Caamsaa bara 2007 adeemmsifame irrattis paartii biyya hoogganaa jiru A.D.W.U.I dabalatee paartileen mormitoonni hedduun hirmaataniiru.

Dhimma kana irratti humnoonni alaas ta’an paartileen mormitoonni Itiyoophiyaa karaa Nagaatiin sochoona jechuun murteessan akka isaanitti toletti waan barbaadan hunda jechaa turanis Itiyoophiyaan biyya sirna paarttilee hedduu hordofaa jirtu ta’uushee hirmaannaa paartilee qabatamaan mul’atu kana caalaa ragaan gara biraa hin jiru.

Filannoo waliigalaa bara 2007

Filannoon biyyaalessaa caamsaa 16 bara 2007 adeemsifame akkuma filannoowwan kanaan duraa paartiiwwan hedduun kan itti hirmaatanidha.Paartii amma biyya bulchaa jiru dabalatee paarttileen mormitoonni hedduun sadarkaa Naannoleefi biyyaalessaatiin socho’an seera filannoo biyyattii kabajuudhaan hirmaataniiru.

Paartileen kun daangaa yeroo boordiin filannoo Itiyoophiyaa kaa’e keessatti kaayyoofi imaammata isaanii haala mijaa’aa uumameefitti fayyadamuudhaan ummatatti beeksifataniiru.

Saboonni sab-lammoonniifi ummattoonni Itiyoophiyaatis filmaata bilisaan dhiyaateef keessaa kan barbaadan filataniiru.

Paartiin caalmaa sagalee ol’aanaa argate Addi Demookraatawa Warraaqsa Ummattoota Itiyoophiyaatis akkaataa bu’aa argateetiin torban darbe mootummaa Federaalaa hundeessuudhaan sochii misoomaafi guddinaaf eegalame itti fufsiisuuf waadaa galuudhaan carraaqqiisaa itti fufaa jira.

Haaluma walfakkaatuun Mootummooni Naannoleetis akkaataa caaseeffama isaaniitiin haala qabatamaa Naannawa isaaniirratti bu’uraawuun mootummaa hundeessuudhaan soch’aa jiru.Hundeeffamni mootummoota Naanolees ta’e kan Mootummaa Federaalaa  filannoo waliigalaa bara darbeetiin sagalee saboonni sab-lammoonniifi ummattoonni Itiyoophiyaa kennan irraa kan maddu akka ta’e hubachuun barbaachisaadha.

Akkuma beekamu caaseffama mootummaa kana keessatti keessumattuu manneen maree keessatti bakka bu’oonni paartilee mormitootaa hirmaachuu hun dandeenye.Sababiin kanaa ammoo bakka bu’oonni paartilee mormitootaa sagalee ummataa manneen mareetti hirmaachuu isan dandeessisu dhabuusaaniiti.

Asirratti wanti hubatamuu qabu ummanni kaayyoofi imaammata paartilee mormitootaa deeggaruudhaan isaan filate hin jiru jechuu miti.bu’aa yeroo buufatawwan filannootti borumtii guyyaa filannootti maxxanafame irraa hubachuun akka danda’ameetti bakka bu’oonni paartilee mormitootaas sagalee deeggartoota isaanii hedduu argataniiru.

Garuu akkaataa seera biyyattiitiin paartii sagalee caalmaa argatetu injifata waan ta’eef A.D.W.U.I filannoo marsaa shanaffaatiinis caalmaa sagalee ol’aanaadhaan injifachuun mootummaa hundeessee Ummata tajaajiluuf carroomeera.

Dhimma biyyaa irratti paartileen akkamitti hirmaatu?

Mootummaan Itiyoophiyaa torban darbe dhimmoolee adda addaa irratti bakka bu'oota paartilee mormitoota sadarkaa guutuu biyyaafi Naannoleetiin socho'an wajjin mari'ateera.

Walatajjiin maree galma wal ga'ii dhaabbata Mootummoota Gamtoomaniitti adeemsifame kun raawwii karoora guddinaafi tiraansfoormeeshinii marsaa jalqabaafi karoora marsaa 2ffaa irratti kan xiyyeeffate akka ta'e beekameera.

Gaaffilee gara garaa bakka bu'oonni tasgabbiidhaan dhiyeessaniifis ministirri muummichi Hayilamaariyaam Dassaalany deebii  bal'aa akka kennan hubatameera.

Waa'ee biyyaa irratti waliigaluudhaan hojjechuu qabna jechuun paartilee haala kanaan mootummaatti dhiyaachuun hojjetaniif galata galchuun barbaachisaadha.

Wantoonni waltajjii maree kana irratti ka'an hundumaa kan fayyadanidha malee kan miidhan miti.

Odeeffannoon argame akka mul'isetti bakka bu'oonni paartilee mormitootaa gara garaa dhimma bulchiinsa gaariifi rakkoolee raawwii irratti mudatan bal'inaan kaasuudhaan fuulleetti mootummaa wajjin mari'ataniiru.Kun waan jajjabeeffamuu qabudha.

Mootummaanis biyyis,ummannis paartileen mormitoonnis waan fayyadamaniif qeeqa barbaachisaa kaasuun hundumaarraa eegama.Qeeqni sirrin ofis biyyas fayyada waan ta’eef waltajjiiwwan haala kanaan qophaa’anitti fayyadamuun barbaachisaadha.

Waltajjii kana irratti paartileen afeeraman hundi akka hin hirmanane hubatameera.kan hirmaate paartilee 20 qofadha jedhameera.paartileen kanneen hafan kan akkaa paartii Samaayaawiifi Madrak jedhamuun beekaman maalif hirmaachuu dadhaban?waa'een isaanii xiyyeeffannoo argatee ilaalamuu qaba.Moo waa'een biyyaa isaan hin ilaallatuu laata?

Waltajjiin maree kun haala bu’a qabeessa ta’een erga xumuramee booda dura taa’aan paartii Samaayaawii Yiliqaal Geetinnat yaada kennaniin ‘waltajjii maree mootummaan qopheesse kanatti nuti utuu hin hirmaatin kan hafne maree kana dura dhimmi siyaasaa ilaalamuu qabu waan jiruufi’ jechuun isaanii dhag’ameera.

Dhimmi siyaasaa mari’achiisaa ta’e kan akkamiiti laata?kana isaanumatu beeka.Dhugaan qabatamaan jiru yammuu sakatta’amee ilaalamu garuu sababiin isaan waltajjii kana irraa ittiin hafan kan isaan jedhan kana miti.

Paartileen tokko tokko mareetti maalif hirmaachuu dadhaban?

Mootummaan Itiyoophiyaa A.D.W.U.I’tiin hoogganamu paartileen mormitoonni sagalaa ummataa ol’aanaa argachuun mana maree bakka bu’oota ummataa  keessatti hirmaachuu dadhabanis dhimmoolee biyyaa walnutaasisan irratti wal ta’uumsaan hojjenna jechuun waadaa seeneera.

Waadaa isaa kanas maree raawwii karoora guddinaafi tiraansfoormeeshinii marsaa jalqabaafi karoora marsaa 2ffaa irratti bakka bu’oota paartilee wajjin tibbana taasifame kana irratti qabatamaan mirkaneesseera.Ministirri muummichi Hayilamaariyaam Dassaalany waltajjii kana irratti akka mirkaneessanitti mareen paaritilee mormitoota wajjin dhimmoolee waliin wajjinii irratti taasifamu gara fuuduraas kan cimee itti fufu ta’a.

Paartiiwwan waltajjii ammaa kana irratti hin hirmaanne garuu sababa rakkoo of tuulummaa isaaniifi dhiibbaa alaa isaan irratti taasifamuun gara fuulduraattis waltajjii maree irratti hirmaachuu akka hin dandeenye tilmaamuun rakkisaa miti.”Yaa Soogiddaa ofii jettu mi’aayi diddu Dhakaadha jedhanii sigatu”jedhe mammaaksi.