Waa’ee Finfinnee seenaan hin dagatu-Kutaa 1ffaa

 

Hagayya 17,2014 Finfinnee(TW) Dhimmi Magaalaa Finfinnee yoo ka’u adeemsa siyaasaa Itiyoophiyaatu akka malee ho’a.Rakkoon sababa Finfinneetiin bu’aa siyaasaa galmeessifachuufi fudhatama argachuuf siyaasa finiinsuu kun waggoota hedduuf turee jira.Hooggansi jijjiiramaa rakkoo kana sirritti hubate ammoo dhimma kanaaf fala waaraa argamsiisuun barbaachisaa akka ta’e amanee hojjechuudhaan bu’aa hunduma gammachiisuu danda’u argamsiiseera.

Kana jechuun murtee daangaa bulchiinsaa Magaalaa Finfinneefi godina addaa naannawa Finfinnee jalqaba torban baatii Hagayyaa bara 2014 ummatatti beeksifameen humnoonni gaddaniifi ammallee murtee kana morman hin jiran jechuu miti.Kanneen hubannoo hin qabne dabalatee humnoonni adda addaa biyya keessaafi biyya alaa jiran murtee waliigaltee Mootummaa Naannoo Oromiyaafi bulchiinsa Magaalaa Finfinneetiin murteeffame kana mormaa jiru.Haala qabatamaa amma jiruun dirreetti ba’anii mormii isaanii dhageessisuu waan hin dandeenyeefi malee haala mijaa’aa utuu argatanii hiriira ba’uu irraa waan gara duubaatti jedhan hin fakkaatan.

 

Kanneen dhimmichi ajandaa ta’ee akka itti fufu barbaadan akka jiranis inuma beekama.Iccitiin kan gunguman,murtee darbeen kan yaadda’an,akkam taana?kanneen jedhan jiru.Kanneen kun lammiiwwan hubannoo gahaa hin qabneefi olola humnoota adda addaatiin burjaaja’anidha.Jiraattoota haala akkanaa keessa jiraniif fala argamsiisuun kan danda’amu hojii qabatamaa hojjechuu qofaadhaan ta’a.Jiraattoonni sababa murtee darbeen yaadda’an adeemsa jireenyaa ammaan boodaa keessatti miidhama malee jireenya isaanii itti fufuudhaan mirkaneeffachuu danda’a’u.Daangaan bulchiinsaa adda baafamuun jiraattoonni tajaajila gahaa akka argatan,rakkoo bulchiinsa gaarii dhabuutiin akka hin dararamne taasisa.

Kana malees daangaan bulchiinsaa adda baafamee beekamuun dallaaloota jidduu deemuudhaan qabeenya lafaa daldalaa oolanitti balbala cufa.Qonnaan bultoonni naannawa Finfinnee jiraatan akka kanaan duraa qayee isaanii irraa utuu hin buqqa’in tasgabbaa’uudhaan akka jiraatan taasisa.Jiraattoonni Magaalaa Finfinneetis walitti dhufeenya qonnaan bultoota Oromoo naannawa Finfinnee jiran wajjin qabaniin omishawwan akaakuu gara garaa argachuudhaan fayyadamuu danda’u.Diinagdeedhaan wal utubuutu uumama.

 

Oromoon lafa irra jiraatu irraa kanaan dura baroota sirna Atseewwaniifi moototaa keessa diqamaan buqqufamuun gara qarqaraatti dhiibamuuf dirqame.Utuu hin jaalatin lafa isaa irraa fedhii malee buqqa’e.Sababa kanaan jireenyi qonnaan bultoota Oromoofi ijoollee isaanii jireenya gaadadoo ta’ee hafe.Sirnoonni itti aananii dhufuudhaan humnaan taayitaa qabatanis sababa magaalaa Finfinnee babal’isuutiin tarkaanfii yeroo adda addaatti fudhataniin rakkoon qonnaan bultoota Oromoo kun itti hammaachaa deeme malee fala argachuu hin dandeenye.

Keessumattuu sirni waayyaanneedhaan hoogganamaa tureefi qabsoo walootiin barbadaa’uuf dirqame maqaa misoomaatiin qonnaan bultoonni naannawa Finfinnee daran akka miidhaman taasiseera.

Shirri maqaa misooma manneen waliin jireenyaa Kondominiyamiitiin wayyaaneen shirte qonnaan bultoota naannawa Finfinnee kumaatamaan lakkaa’aman iddoo jireenya isaaniirraa akka buqqa’an taasisuudhaan miidhaa himamuudhaan hin xumuramne geessiseera.Maatiin qonnaan bultootaa bittinnaa’aniiru,qonnaan bultoonnis hojii ittiin jiraatan dhabuudhaan waardiyaa ta’anii jiraachuuf dirqamaniiru.

Ijoolleen dubaraa ammoo hojjettuu manaa ta’uun akkasumas gara biyyaalee Arabaatti godaanuudhaan rakkoowwan suukaneessaa ta’aniif saaxilamaniiru.Murteen seenaa qabeessi hooggansa jijjiiramaatiin murteeffame rakkooleen tartiibaan eeraman kun lammata akka hin mudanne taasisuudhaan ummanni Oromoo sabootaafi sab-lammoota kanneen biroo wajjin wal kabajaafi wal jaalalaan akka jiraatuuf shoora ol’aanaa gumaacha.Barreeffama kana utuun barreessaa jiruu ABO’n Daawud Ibsaatiin hoogganamu murtee seenaa qabeessa kana akka mormeefi Kantiibaa bulchiinsa Magaalaa Finfinnee adde Adaanachi Abeebee akka qeeqe gabaafameera.Obbo Daawud Ibsaa eenyu?maalif murtee ummata fayyadu kana morme?barreeffama itti aanu kutaa 2ffaa keessatti dubbiftu.Fayyaa ta’aa!