Salphatanii waayyuu hin himatanii

 

Adoolessa 30,2014 Finfinnee(TW) Diinonni keessaafi alaa mari’atanii tarsiimoo badii qopheeffatanii gamtoomuudhaan biyya keeya Itiyoophiyaa irratti duulan,Biyyi Sabaafi sab-lammootaafi ummattootaa akka bittinnooftee haftuuf irree isaanii tokkoomsuudhaan socho’an.Maloota adda addaa qopheeffachuudhaan waan danda’an hunda godhan.Garuu kan karoorfatanii ka’an hunduu galma ga’uufii didee karaa irratti fashalaa’uudhaan hafuuf dirqaman.

Diinonni alaa Mootummaa Gibtsiifi humnoota kenneen biroo misoomaafi guddina Itiyoophiyaa hin feenedha.Kanneen kun biyya keessaa ergamtoota dhimma isaanii raawwachaiisaniif qabu.Ergamtoonni keessaa ammoo Wayyaanee, Shaneefi garee shororkeessummaan beekamu al-Shabaabidha.

Akka Jawaar Mahaammad shaneen hin jiru jedhutti utuu hin taane shaneen qabatamaan jira.Sanuu Gareen shororkeessaan kun Daawud Ibsaafi Jawaar Mahaammad dabalatee hooggantoota paartii Koongransii Federaala Oromoo hundaan hoogganama.Dhugaa kana wal dhoksuu hin qabnu sirritti walitti himuu qabna.

Jawaar haasawa dhiyeenya kana dhageessise tokkoon wanti shanee jedhamu hin jiru,maqaa ‘daabbootiin’hin waaminaa!kan jiru OLA dha.Waraana bilisummaa Oromoo jedhaa waamaa jechuun nutti hime.

Waraanni bilisummaa Oromoo’ eenyu irraa Saba Oromoo bilisoomsa laata?Kanneen OLA ykn.’waraana bilisummaa Oromoo’ faarfataniifi lelisan gaaffii kanaaf deebii qabaatamaa sababaan deeggarame tokkollee hin qaban.

Sabni Oromoo qabsoo hadhooftuu waggoota hedduuf ofumaaf taasiseen erga of bilisoomsee waggaan hedduun lakkaa’ameera.Ofiifuu diinaaf ergamanii buluudhaan‘’Oromoo bilisoomsina’ jedhanii nutti himan.Dhiitee bariitee dhara nutti odeessan.Ergitoota isaanii gammachiisuuf lallaban.Dubbiin fakkeessuu tun soba adii akka taate hunduu ni beeka.Kan burjaajeeffameefi sababa jireenya hiyyummaatiin raakametu waan dabartuuf itti fakkaatee ergamtuu diinaa ta’uudhaan dararamaa jira.Kanaaf akka Jawaar Mahaammad nama burjaajessuuf yaalutti utuu hin taane Shaneen qabatamaan jira.Garuu ergamtuu diinotaa waan ta’eef dhumaa jira.Kan bosonaa ba’ee mootummaatti harka kennate baay’eedha.Waamicha mootummaafi abbootii Gadaa Oromootiif kabaja kennuudhaan gara maatiitti kan deebi’es danuudha.

Shaneen ergamtuu wayyaaneeti.Wayyaaneefi al-Shabaab ammoo ergamtoota diina alaati.Dhimma kana sirritti qalbeeffachuun barbaachisaadha.Wayyaaneen raayyaa  ittisa Itiyoophiyaafi humnoota tasgabbii naannoleetiin duula irratti adeemsifameen sirritti waan gobamteef amma humna loltummaa hin qabdu.Meeshaan waraanaa Itiyoophiyaa irraa shiraan saamte hedduun jalaa barbadeeffameera.Akkasuma hidhattoota kumaatamaan lakkaa’amantu jalaa barbadaa’e.Humni wayyaaneen amma qabdu humna ololaati.Ololaan duula cimaa taasisaa jirti.Soba dhugaa fakkeessitee odeessuuf muuxannoo baroota dheeraa qabdi waan ta’eef injifannoon gama kanaan galmeessaa jirtu ol’aanaadha.

Wayyaaneen inifannoo ololaa kana maddiitti injifannoo loltummaas galmeessuuf wixiffachaa jirti.Kana ammoo karaa shaneefi al-Shabaabiin galmeessisuuf kan yaalaa jirtu ta’us akka karoorfattetti milkaa’uufii hin dandeenye.Kunis waan jaalaa fashalaa’eef booyichaafi gaddarra jirti.Keessumattuu  hooggansiifi hidhattoonni al-Shabaab karaa Naannoo Sumaaleetiin Itiyoophiyaa weereeruuf dhufan tarkaanfii Raayyaa Ittisa Itiyoophiyaafi humna addaa Naannoo Sumaaleetiin waan barbadeeffamaniif wayyaaneefi ergitoonni ishii gadda cimaarra jiru.

Ministeerri Ittisa Itiyoophiyaa odeeffannoo kaleessa baaseen hooggantoonni garee al-Shabaab 24 dabalatee hidhattoonni 800 caalan tarkaanfii irratti fudhatameen ajjeefamaniiru.Akkaatuma kanaan hooggantoonni garee al-Shabaab kanatti aanee maqaan isaanii tartiibaan tarreeffame akka barbadeeffaman himameera.

1,Fu’aad Mahaammd Kaahiliif-Itti gaafatamaa damee ololaa al-Shabaab

2.Abdulaziiz Abumuussaa- oduu himaa al-Shabaab

3.Abdiinuur Iissee-Itti gaafatamaa godina Bokooliifi daangaa Itiyoophiyaa

4.Sheek La’aab dhalaataa Somaaliyaa-Itti gaafatamaa Loojistiikii naannawa kibba- bahaa

5.Abuu Muussaa-Itti aanaa af-yaa’ii

6.Alii Mahaammad Hasan-Nama 2ffaa koree al-Shabaab

7.Adam-itti aanaa ajajaa garee shororkeessaa loo’ee gara biyyaa seenuuf yaale.

8.Muktaar Gaab-Miseensa koree jiddu galeessaa

9.Amiir Abdallaa(Mahaammad Abdullaahii)-Itti gaafatamaa leenjii al-Shabaab

10.Injinar Jahaad Sireewaa(Mujaahiid Fayisal)-Kaampii Biluu filaayitti itti gaafatamaa leenjii

11.Sheek Huseen Bardallee- walitti qabaa ashuuraa godina Bokol

12.Sheek Haasan Nuunnoo-Itti gaafatamaa duula jabahaa Shabalee gara gadii

13.Yaasiin Daree-Amiira

14.Saalaah Daree-Itti gaafatamaa baruumsa al-Shabaab godina Baay

15.Abusalaam-walitti qabaa al-Shabaab godina Bokool

16.Hamzii Abdullaahii- Itti gaafatamaa odeeffannoo godina Baay

17.Abdullaahii Haajii-Ajajaa loltummaa godina Baayiifi Bokool

18.Muktaar Booroo-Amiira

19.Abdurashiid Gaaboo- Amiira

20.Abduukiim Gaduudaa-Amiira

21.Muktaar Gaab-Itti gaafatamaa duula naannawaa

22.Ayyuub Daawud-Amiira

23Alii Adan-Amiira

24 Hasan Mahaamamd- Amiira dha.

Hooggansi garee shororkeessaa al-Shabaab kun hundi dhumuun Wayyaanee gadda cimaa keessa seenssieera.Kan karaa lixaatiin jalaa fashaalaa’e karaa bahaatiinis dabalameera.Gaddatu gadda irratti dabalame.Anaa nyaatu!Kanaan dura Abbaay Tsahaayeefi Siyyum Masfin dabalatee hooggansa hedduu dhabuuf kan dirqamte Wayyaaneen Faranjoota tibbana Maqalee dhaquun ishiin daawwataniin of jajjabeessitus gaddi itti daddabalamuudhaan rakkattee raakamaa jirti.Kanneen wayyaanee wajjin wal ta’uudhaan alaa al-Shabaab ergatanis gadda cimaarra akka jiran beekamaadhaa.Salphina haguuggatanii taa’an.Kana himachuu hin danda’an.Salphatanii waayyuu hin himatani! Itiyoophiyaa hin tuqinaa!Irra deddeebi’uudhaan kana isinitti himna.