Waa’ee Finfinnee seenaan hin dagatu-Kutaa 2ffaa

 

Hagayya 19,2014 Finfinnee(TW) Daawud Ibsaa murtee ummata Oromoo fayyadu maalif balaaleeffate?Daangaan bulchiinsaa Finfinneefi godina addaa Oromiyaa Naannawa Finfinnee adda baafamee beekamuun Ummata Oromoo hin fayyaduu?Daawud Ibsaa eenyu innii?Barreeffama kutaa 2ffaa dhimma Finfinnee irratti xiyyeeffatu kanaan gaaffilee kanaaf deebii kennuudhaanin jalqaba.

Jalqaba irratti gaaffii eenyummaa obbo Daawudiifi aantummaa isaa haa ilaallu.Daawud Ibsaa maqaan ijoollummaa Fireew akka ta’e isumatu dubbate gaaffiifi deebii miidiyaawwan adda addaa irratti kanaan dura taasise irratti haqa kana himeera.Iccitiisaa isumatu hurufa irratti bittinneesse.Erga inni dhugaa kana himee booda Fireew Maashoo akka jedhamu dubbatamaa ture.Daawud Ibsaa maqaa qabsooti jedhe.Kanaaf namtichi kun Tigree ta’uu hin oolu jechuudhaan shakkuudhaan bira dabarre.

Gochi inni raawwatu ammoo kan wayyaanee deeggaru ta’uusaa mirkaneeffannaan namtichi Tigrree ta’uun mamsiisaa akka hin taane hubatame.Daawud Ibsaa Tigreedha.Namtichi kun sanyii Tigree utuu qabaachuu baatee akkamitti Qondaaltoota Tigreetiif looguudhaan Oromoon akka miidhamu taasisaa?Gaafachuun gaariidha.Yoo waa gaafatte dhimmicha qorachuudhaan deebiisaa ofumaa bira ga’uu dandeessa.

Daawud Ibsaa qabsaa’oota beekamoo ofirraa ari’ee,bittinneessee ani hoogganaa ABO’ti jedhee gammoojjii Eertiraa keessatti tortoree waggoota hedduu jiraate.Mootummaan jijjiiramaa Dr.Abiy Ahmadiin hoogganamu kadhatee  karaa nagaa yoo qabsooftan wayya jedhee itti himaan foqoquudhaan gara Finfinnee dhufe.

Magaalaa Finfinneetti ummata Oromoo bal’aan simaannaan gootaa taasifameef.Simannaan ABO Asmaraa irraa gara Finfinneetti deebi’ee dhufeef taasifame yoomiyyuu kan dagatamu miti.Finfinneen gammachuudhaan fishiliqxe. tibba sana waan ta’e eenyutu dagataa?Alaabaan ABO adda babayii Finfinnee hedduu irratti mirmirfamee,halluun alaabaa ABO qarqara daandiidiiwwan hedduu irratti dibamee mul’ate

Qondaaltoonni ABO Daawud Ibsaa wajjin gammachuudhaan fishiliquudhaan waan godhan dhaban.Wayyaaneenis keessa keessa gammachuurra akka turte ni beekama.Ummanni bal’aan  miliyoonaan lakkaa’amu ABO deeggara taanaan Abiy Ahmad deeggarsa ummataa hin qabu, yeroo gabaabaa keessatti fonqolchuu dandeenya jechuudhaan gammadan,wayyaanoonni shira xaxuudhaan beekaman.

ABO’n deeggarsa ummata bal’aa akka qabu simannaa adda babayii masqalaa Finfinneetti taasifameen kan hubate Daawud Ibsaa qawwee eenyutu hiiksisa? Eenyutu ammoo hiikkata? Jechuudhaan hooggantoota jijjiiramaatti miidiyaatti ba’uudhaan hime.Dhimmi kun battala sanatti ajandaa guddaa ta’uudhaan odeeffamaa yeroo hedduuf ture.

Edaa wanti duuba jiru hin beekamu waan ta’eef akkasitti afarfame.Jarri durumaanuu walitti hidhamiinsa cimaa akka qaban dhawaataan beekamaa,hubatamaa dhufe.Daawud Ibsaa hidhattoonni ABO bosona jiran hidhannoo hin hiikkatan jechuudhaan ejjennoo qabate cimsee itti fufe.Wayyaaneen yeroo kana hidhattoota ABO jajjabeessuudhaan deeggarsa hin qusataamne taasisuu eegalte.Hidhattoonni ABO maqaa ABO-shaneetiin socho’an onnachuudhaan baankiiwwan Oromiyaa lixaatti argaman cabsanii seenuudhaan saaman.Waan sana booda ta’e hundumaa yaadachuun rakkisaa hin ta’u.

Hundumaafuu “Dubbiin baaya’ateef harreetti hin fe’amu’ jedha Oromoon.Murteen daangaa bulchiinsaa dhiyeenya kana Finfinneetti murteeffame gama hundumaanuu ummata bal’aa kan fayyadudha.Murtee kanaan namoonni dhuunfaan sababa rakkoo jiruutiin galii ol’aanaa argachaa turan hin miidhaman jechuun hin danda’amu,sirritti miidhamu.Galiin isaan baraniifi dafqa malee hammaarrachaa turan jalaa hafa.Ummanni bal’aan ammoo murtee seenaa qabeessa kanaan ni fayyadama.Fayyadamtummaan isaas itti fufiinsa kan qabaatu ta’a.

Obbo Daawud Ibsaa murtee seenaa qabeessa ummata bal’aa fayyadu kana maalif balaaleeffateree?Gaaffii kanaaf deebii gahaa kennuuf fagoo deemuun hin barbaachisu.Daawud Ibsaa Tigree waan ta’eef murtee kana balaaleeffate.Aantummaa isaa qondaaltoota Naannoo Tigraayiif maaliin ibsuu danda’aree?Wayyaaneen iddoo amma irra jirtu beekti waan ta’eef kallattiidhaan murtee kana mormuu waan hin dandeenyeef karaa ergamaashii Daawud Ibsaatiin murtee ummata fayyadu kana marmite.Gamoowwan lafa Oromoo saamuudhaan ijaarratte ishii mararuun akka hin oolle inuma beekama.’Utuu beeknuu huuba wajjin jette sareen’jedhan.Waa’ee Finfinnee seenaan hin dagatu,waan hedduu barreeffamee dhalootaaf taa’uu qabutu jira.Kutaa 3ffaan kan itti fufu ta’a.Fayyaa ta’aa!