Godaannisa Seenaafi ilaalcha ekeraa

 Kan darbe yaadachuun adeemsa boruu miidhagaa taasisuuf tola,kanaaf waan darbe yaadachuun barbaachisaadha.

Sabni Oromoo Saba guddicha,kabajamaafi bu’ura sirna Federaalaawaa biyya teenya Itiyoophiyaa jedhamtu kanaati.Sirnoonni abbaa irree kanaan duraa Minilik,Hayilasilaaseefi Darguun saboota sab-lammootaafi Ummattoota Itiyoophiyaa hunda irratti akka barbaadanitti roorrisaa turaniiru.

Keesumattuu roorrisni sirnoota abbaa irree kanaan   Saba Oromoo irra ga’aa ture asii hanga asiiti  jedhamuun kan himamee xumuramu miti.

Sirni Minilik qabeenya lafaa babal’icfachuuf jecha Oromoota irratti duuluudhaan dhiiga Oromoo lafarra lolaaseera,lafeen isaas akka caccabu taasiseer.Sabni Oromoo dararamni hedduun sirna Minilikiin  qindeeffame wayita irra ga’u yeroon callisee taa’ee ilaale tokkollee hin turre.

Asirratti babal’ifannaa sirni Minilik Arsii,Baalee,Harariifi iddoowwan Oromiyaa biroottis  taasise qolachuuf Oromoon kutannoodhaan qabsaaa’eera.Roorroo nafxanyootaa ofirraa qolachuf carraaqqii taasifameenis harkaafi harmi Oromootaa murameera.naf-saalli dhiira Oromoo kolaafameera.Duulli Oromoonni Aanooleefi Calanqoo irratti taasisan kana wajjin kan yaadatamuu qabudha.

Sabni Oromoo haala kanaan mirgaafi faayidaawwan isaa kabajisiisuuf carraaqqiin taasisaa ture kun garuu gurmuufi qindoomina kan qabu waan hin tureef roorroon diinaa waggoota hedduuf akka turuuf haala mijaa’aa uumeera.

Minilik irraa goonfoo dhaaluudhaan taayitaa kan qabate sirni mootii Hayilasillaaseetis hanga xumura bara taayitaa isaatti waanumti akaakileefi akaakayyuun isaa raawwachaa turan akka itti  fufu taasisuudhaan cunqursaan Saba Oromoo irraa ga’u finiinee akka itti fufu taasiseera.

Hayilasillaaseenis Oromoon lafuma isaarratti tajaajilaa muudamtoota sirnichaa ta’uudhaan akka jiraatuuf dirqamsiiseera.Qonnaan bulaan fayyadamaa omishasaa ta’uu dadhabuudhaan jireenya hiyyummaafi gadadoo keessa waggoota hedduu jiraachuuf dirqamuun ofis ta’e ijoolleesaa daara baasuun itti ulfaatee tureera.

Saba Oromoo dabalatee ummattoota cunqurfamtoota Itiyoophiyaatiif kan dhaabbate fakkeessuudhaan sirna mootii Hayilasillaase humnaan fonqolchuudhaan bara 1967 keessa taayitaa kan qabate sirni Darguutis jijjiiramni Oromootaaf argamsiise hin turre.

Qabeenyi lafaa qonnaan bulaadhaaf! Dhaadannoo jedhuun qonnaan bulaan Oromoo hanga  tokko lafa akka argatu kan taasise sirni abbaa irree  Darguu Oromoon fayyadamaa bu’aa dafqasaa akka hin taaneef tooftaawwan adda addaatiin gufuu uumuurra darbee ijoolleen Oromoo adda waraanaatti akka guuramtu taasisuudhaan innis dabareesaatiin Oromoota irratti roorrisuun waggoota 17 tureera.

Walumaagalatti Ummanni Oromoo sirnoota sadeen Minilik,Hayilasillaaseefi Darguu keessa gama hundumaanuu utuu hin fayyadamin jireenya suukaneessaa keessa tureera.

Cunqursaan siyaasaafi hawaas-diinagdee Saba guddicha Oromoo irra ga’aa ture kun Oromoonni hundi aadaafii seenaa isaanii akka hin dagaagifanne taasisee ture.Sirnoonni miidhaa hedduu Oromoo irraan ga’aa turan  du’anis ilaalchi ekeraa isaanii duguugamee waan dhabame hin fakkaatu.

Egaa dhaloonni har’aa darbee darbee meeshaa ilaalcha ekeraa ta’uudhaan miidhamaaf saaxilamaa jiru dhugaa kana beekuufi hubachuu qaba.

Dh.D.U.O/A.D.W.U.I-bu’aa qabsoo bara dheeraa

Ijoolleen cunqurfamtoota Itiyoophiyaa sirnoota abbaa irree balaaleeffatan gammoojjii Itiyoophiyaa kaabaatti galuun sirna abbaa irree Darguu falman.Qabsoon kaayyoo qabatamaafi galma kaawwachuun taasisanis turtii waggoota 17 booda  bara 1983 milkaa’uudhaan Saba Oromoo dabalatee saboonni sab-lammoonniifi ummattoonni Itiyoophiyaa hundi bittaa sirna abbaa irree Darguu jalaa bilisa ba’an.

Humnoota Demookaraatawaa  miseensa ADWUI wajjin dhaabbata demookraatawa Ummata Oromoo(Dh.D.U.O) jalatti gurmaa’uudhaan Naannoon Oromiyaa iddoon hundi Nagaa akka argatu kutannoodhaan kan kan qabsaa’an ijoolleen Oromoo yeroo mootummaa ce’uumsaa bara 1983 irraa eegalee tureen Nagaan akka mirkanaa’u taasisuudhaan fayyadamtummaan Saba Oromoo gama hundumaanuu akka mirkanaa’uuf qabsaa’aniiru.

Qabsoon ijoolleen Oromoo kaayyoodhaan taasisan kun Oromoota hundaaf bu’aa hedduu yoomiyyuu seenaadhaan yaadatamu galmeessiseera.

Ummanni Oromoo bu’aa qabsoosaa bara dheeraafi wareegama ijoollee isaatiin argatetti mamii malee fayyadamuu erga eegalee waggoonni 25 ol lakkaa’amaniiru.Injifannoowwan Sabni Oromoo harkatti galfate duubatti akka deebi’aniif garuu humnoonni adda addaa ilaalcha ekeraa of tuulummaafi dhiphimmaa qabatan yeroo adda addaatti socho’aniiru.

Sochiin ilaalcha ekeraa tibbana lubbuu ijoollee Oromoo galaafateefi qabeenya birrii miliyoonaan lakkaa’amu barbadeesses qaamuma sochii humnoota harcaatoota ilaalcha ekeraati.

Humni kamiyyuu kan haaluu hin dandeenye har’a Ummanni Oromoo fayyadamaa bu’aa damee siyaasaafi hawaas-diingdeeti.Qaamni ajajaan Oromoon omisha isaatti akka hin fayyadamne taasisu hin jiru,Mirgooleen Namoomaafi Demookraasii eenyumaanuu jalaa hin sarbaman.Mirga ofiin of bulchuutti guutumaafi guutuutti fayyadamaa jira.

Haa ta’uutii waggoota darban keessa adeemsa bulchiinsaafi kenniinsa tajaajilaa keessatti rakkooleen Oromoota mudatan hin jiran jechuun hin danda’amu.Kunis fala argachuu kan danda’u qabsoo demokraatawaa Saba Oromoo guddichaan taasifamuuni malee humnoota ilaalcha ekeraa qabatanii olola sobaatiin socho’aniin miti.