ሕወሓትን ይደግፋሉ ተብለው ተዘግተው የነበሩ ሆቴሎች ተከፍተው ብድር ተመቻቸላቸው

 

የወንጀል ምርመራ ሒደቱ እንደሚቀጥል ፍትሕ ሚኒስቴር አስታውቋል

በሽብርተኝነት የተፈረጀውን ሕወሓት ይደግፋሉ ተብለው ከስምንት ወራት በላይ ተዘግተው የቆዩት ሆቴሎች፣ በአነስተኛ ወለድ ብድር እንደተመቻቸላቸው የኢትዮጵያ ሆቴልና ማርኬቲንግ ማኅበር አስታወቀ፡፡

ሆቴሎቹ በዋነኝነት ገንዘብ በማሸሽ፣ በጦርነቱ ወቅት ከሕወሓት ጎን በመሆን በፋይናንስ  በማገዝና በመሳሰሉ ጉዳዮች በመጠርጠራቸው ታሽገው ቆይተዋል፡፡ ከስምንት ወራት በላይ ለሆነ ጊዜ አገልግሎታቸውን ሙሉ በሙሉ አቋርጠው የቆዩት ሆቴሎቹ ከ2,000 በላይ ሠራተኞች እንዳሏቸውና ካለፈው ሳምንት ጀምሮ ወደ አገልግሎት መመለሳቸው ታውቋል።

ተዘግተው ከነበሩት አሥር ያህል ሆቴሎች መካከል ካሌብ ሆቴል፣  አክሱም ሆቴል፣ ሆሊዴይ ሆቴል፣ ሐርመኒ ሆቴልና አዲሲኒያ ሆቴል ይገኙበታል፡፡ የአዲሲኒያ ሆቴል ባለቤት ወ/ሮ ሐዲስ ገብረ ማርያም ሆቴሉ ተዘግቶ በቆየበት ወቅት ከፍተኛ ኪሳራ መድረሱን ተናግረዋል፡፡ 

በተለይም ከአፍሪካ ኅብረት ጉባዔና ከዳያስፖራ ወደ አገር ቤት መምጣት ጋር ተያይዞ የሆቴል ዘርፉ መነቃቃት ያሳየበት ጊዜ ቢሆንም፣ ሆቴላቸው አገልግሎት ባለመስጠቱ ተጠቃሚ መሆን አለመቻሉን ገልጸዋል።

አዲሲኒያ ከ120 በላይ ሠራተኞች እንዳሉት የገለጹት ወ/ሮ ሐዲስ የሠራተኞቹን ደመወዝ መክፈል የቻለው፣ ሆቴሉ ከታሸገበት ጊዜ በኋላ ባለው አንድ ወር ብቻ እንደነበር ተናግረዋል፡፡ ከሥራ ውጪ የቆዩት ሠራተኞች ሆቴሉ መከፈቱን ተከትሎ ወደ ሠራቸው ተመልሰዋል ብለዋል።

የሆሊዴይ ሆቴል ማናጀር አቶ ፍቃዱ አብረሃም በበኩላቸው፣ ሆቴሉ ተዘግቶ በቆየባቸው ስምንት ወራት ውስጥ የነበረውን ደንበኞች በማጣቱ በድጋሚ ደንቦኞቹን ለማግኘት ፈታኝ እንዳደረገበት ገልጸዋል፡፡ በአገልግሎት ዋጋም በሥራ ላይ ከቆዩ ሆቴሎች ጋር ሲነፃፀር ዝቅተኛ ሲሆን፣ ማስተካከያ ለማድረግም መቸገሩን አስረድተዋል፡፡

የመደበኛ ብድርም ሆነ በኮቪድ-19 ወቅት የተበደሩት ብድር ተደራራቢ ጫና እየፈጠረባቸው መሆኑን የገለጹት አቶ ፍቃዱ፣ የብድር ማራዘሚያ ጥያቄያቸው ተቀባይነት ባለማግኘቱ ንብረት ሸጠው መክፈላቸውን አክለዋል፡፡ ሆሊዴይ ሆቴል ከ100 በላይ ሠራተኞች ያሉት አሁን በድጋሚ ወደ አገልግሎት ሲገባ ለሠራተኞቹ ጥሪ ማድረጉን ገልጸዋል።

ሆቴሎቹ ለበርካታ ጊዜያት ተዘግተው በመቆየታቸው የደረሰባቸውን ኪሳራ ታሳቢ በማድረግ ከብሔራዊ ባንክ ጋር በመነጋገር ብድር እንደተመቻቸላቸው፣ የኢትዮጵያ ሆቴልና ቱሪዝም ማኅበር ፕሬዚዳንት አቶ ጌታሁን ዓለሙ ገልጸዋል፡፡ በአነስተኛ ወለድ የተዘጋጀው ብድር በተለይም ተዘግተው በመቆየታቸው ለሠራተኞች ደመወዝ መክፈል ያልቻሉ ሆቴሎችን ለሥራ ማስኬጃነት እንዲጠቀሙበት ለማገዝ የታሰበ መሆኑን አክለዋል፡፡

ብድሩ በ5.5 በመቶ ወለድ የተሰጠ መሆኑን፣ ለእያንዳንዱ ሆቴል አምስት ሚሊየን ብር እንዲሰጥ መወሰኑን ገልጸው የመመለሻ ጊዜውን ከአንድ ዓመት ተኩል እስከ ሁለት ዓመት እንደሚሆን አስረድተዋል፡፡  

ሕወሓትን ይደግፋሉ ተብለው የተጠረጠሩትን ሆቴሎችን ጉዳይ የሚከታተለው ፍትሕ ሚኒስቴር እስካሁን ውሳኔ አልሰጠም፡፡ ሆቴሎቹ ለአገልግሎት ክፍት ቢሆኑም የወንጀል ተሳትፏቸው በምርመራ ላይ መሆኑንና ሒደቱም እንደሚቀጥል የፍትሕ ሚኒስትር ዴኤታው አቶ ፈቃዱ ፀጋ ተናግረዋል። ማስተዳደር፣ መቆጣጠርም ሆነ ማሸግ ውስጥ ፍትሕ ሚኒስቴር ተሳትፎ እንደሌለው አክለዋል፡፡

@Reporter