Gammachuu maxxantootaa

Balaan hoongee lammiiwwan keenya mudateera.Odeeffannoo mootummaan ifoomseenis Oromiyaa dabalatee Naannolee gara garaa keessatti Lammiwwan miliyoona 8fi kuma 200 ga’an balaa kanaaf saaxilamaniiru.

Sababiin rakkoo kanaa ammoo jijjiirma haala qilleensaa Itiyoophiyaa qofa utuu hin taane biyyaalee Addunyaa kanneen biroos raakaa jirudha.Rakkoon kun waggaa kudhanitti al tokko deddeebi’uudhaan lammiiwwan keenya irratti miidhaa suukaneessaa geessiseera.

Balaan hoongee amma mudates haala jiruufi jireenya lammiiwwan keenyaa barame kan faallesse ta’uunsaa beekamaadha.Rakkoo sababa jijjiirama haala qilleensaatiin mudate kana wajjin wal qabatee lammiiwwan keenya irra miidhaan hammaataan akka hin geenyeef mootummaan hojjechaa jira.

Sadarkaa eegamurra hin jiru jedhamaa kan ture birmannaan deeggartoota biyya alaas tibbana abdachiisaa ta’eera.Odeefafnnoo tibbana dhaga’ameen mootummaan Ameerikaa balaa hoongee Itiyoophiyaatti mudateen lammiiwwan rakkatan baraaruuf Doolaara miliyoona 97 kenneera,Dhaabbanni mootummoota gamtoomaniis Doolaara miliyoona 17 gumaacheera.Birmannaan qaamolee Addunyaa kaanneen biroos ni dabala jedhamee eegama.

Kana maddiitti Mootummaan Itiyoophiyaa Dh.D.U.O/A.D.W.U.In hoogganamaa jiru lammiiwwan dhaqabuun gargaarsa barbaachisaa taasisaa jira,Balaa kanaan lubbuun Namaafi Beelladaa akka hin dabarreef carraaqqiin taasifamaa jiru kan qabatamaan mul’achaa jirudha.

Maxxantoonni maalif gammadan?

Maxxantoonni biyya keessas ta’e biyya alaattii argaman kan ilaalcha dhiphummaafi Of tuulummaa afarsan balaan hoongee biyya keenyatti mudachuun akka isaan gammachiise sochii qabatamaan taasisaa jiran irraa hubachuun rakkisaa hin ta’u.

Kanneen amma mootummaa ADWUI’n hoogganamu yakkuun akka malee wixiffachaa jiran xummurri fiigicha isaanii bu’aa siyaasaa argachuudha.

Balaan hoongee biyya keenyattis ta’e biyyaalee Addunya kanneen birootti yeroo adda addaatti mudachuun waanuma kanaan duraa beekamudha.Rakkoon kun hanqina dhaaba biyya kana bulchaa jiruun kan mudatedha jechuun bookkisuun humnoota kana eesumaanuu isaan hin ga’u.

Kanaa mannaa kan isaaniif wayyu ummataaf yaadanii hin beekan malee yoo ummataaf dhimmanii kan yaadan ta’e lammiiwwan keenya balaa kana irraa baraaruuf mootummaa biyya bulchaa jiru wajin akka hojjennuuf haalli nuuf mijaa’uu qaba jechuun gaafachuu wayyaafiiyyu,Kanatu deggarsa Ummta irraa barbaadan isaaniif argamsiisa ture

Kana gochuu akka hin dandeenyeef ammoo ilaalchi of tuulummaafi dhiphummaa hudhee isaan qabe hin hayyamuuf waan ta’eef amma maqaa mootummaa balleessuufi sochii mira ummataa tuqu taasisuun waanuma danda’an gochaa jiru.

Malaammaltoota qolachuu

Gargaarsi mootummaan kallattii adda addaatiin lammiiwwan keenya rakkatan bira akka ga’uuf ergu kallattiidhaan fayyadamtoota bira ga’uu qaba.Malaammaltoonni gargaarsa dhiyaatu karaatti hanbisuuf socho’an hin jiran jechuudhaan mamii malee dubbachuun hin danda’amu.

Malaammaltoonni caasaa mootummaa keessatti argaman ammoo kanaaf haala mijaa’aa qabu.Kanneen kana of eeggannoo cimaadhaan hordofuun saaxiluufi seeratti akka dhiyaatan taasisuun barbaachisaadha.

Kana maddiitti rakkoon yeroo lammiiwwan keenya mudate kun fala waaraa akka argatuuf lammiin biyyaaf yaadu hundumtuu olola diinaa hordofuu dhiisuudhaan damee hojii irratti bobba’e hundaan kutannoodhaan hojjechuutu irraa eegama.