Filatamuu Itiyoophiyaafi mira diinawwanshee

Waldaan Mootummoota Addunyaa diigamuun dhaabbanni Mootummoota gamtoomanii amma jiru wayita hundeeffamu ardii Afrikaa keessaa miseensa ta’uudhaan kan hundeessan Itiyoophiyaafi Laayibeeriyaa qofaadha.Kun ta’uu kan danda’e Itiyoophiyaafi Laayibeeriyaan wayita sanatti biyyaalee ardii Afrikaa keessaa koloneeffattoota Awurooppaatiin kan hin bulle waan ta’aniifi.Biyyaaleen Awurooppaa kanneen biroo baay’oonni bittaa koloneeffannoo biyyaalee Awurooppaa jala waan turaniif hundeessitoota dhaabbatichaa ta’uuf hin carroomne.

Dhaabbatichi hundeeffamuun sochii erga eegalee asitti Itiyoophiyaan yeroo lama mana maree tasgabbii dhaabbata mootummoota gamtoomanii keessatti filatamuudhaan tajaajiltee jirti.Kunis kan ta’e akka lakkoofsa warra Awurooppaa bara 1967-1968,akkasumas bara 1989-1990’tti Itiyoophiyaan miseensa mana maree tasgabbii ta’uudhaan hawaasa idila Addunyaa tajaajiltee jirti.

Kunoo kaleessas marsaa sadaffaadhaan miseensa mana marichaa ta’uun waggoota lamaaf tajaajiluuf biyyaalee ardii Afrikaa bakka bu’uudhaan caalmaa sagalee ol’aanaadhaan filatamtee jirti.Odeeffannoon jiru akka mul’isetti miseensoota dhaabbatichaa yaa’ii waliigalaa irratti argaman 190 keessaa sagalee biyyaalee 185 argachuudhaan caalmaa ol’aanaadhaan filatamte.Akkaataa kanaan ALA baatii Amajjii bara 2017-2018’tti miseensa mana maree tasgabbii dhaabbata mootummoota gamtoomanii ta’uun kan tajaajiltu ta’a.Itiyoophiyaan ardii Afrikaa bakka bu’uudhaan itti gaafatama ol’aanaa kana kan fudhatte biyya Angoolaa jedhamtu bakka bu’uudhaani.

Itiyoophiyaan akkamitti filatamuu dandeesse?

Biyyaaleen Addunyaa lakkoofsaan 185 ga’an Itiyoophiyaa akkamitti filachuu danda’an? gaaffiin jedhu ka’uu danda’a.ALA bara 1950 irraa eegaluudhaan biyyi teenya Itiyoophiyaan ergama Nagaa kabajisiisuu dhaabbata mootummoota gamtoomanii keessatti hirmaachaa jirti,ergama kana hanga ammaatti akka itti fuftee jirtus beekamaadha.

Kanaan dura Itiyoophiyaan Kooriyaa,Koongoo,Ruwaandaa,Burundiifi Laayibeeriyaatti loltoota ishee bobbaasuudhaan ergama Nagaa kabajisiisuu itti kenname ga’uumsaan baatee jirti.Wayita ammaas Suudaan,Suudaan kibbaafi Soomaaliyaatti ergama Nagaa kabajisiisuu idila Addunyaa ga’uumsaan ba’aa jirti.Ga’uumsi Itiyoophiyaan gama kanaan mul’ifteefi ammaan tanas mul’isaa jirtu mana marichaa keessatti marsaa sadaffaadhaan caalmaa sagalee ol’aanaadhaan akka filatamtuuf shoora ol’aanaa gumaacheera.

Kana malees Nagaa Naannawa Afrikaa bahaa kabajisiisuudhaan beekkamtiin Itiyoophiyaan argatte waltajjii idila Addunyaa kana irratti dhiyaachuudhaan akka filatamtuuf shoorri gumaache ol’aanaadha jechuun ni danda’ama.

Itiyoophiyaan baqattoota biyyaalee Addunyaa kamirraayyuu dhufaniif balbalashee banuun keessummeessaa jirti.Kanaanis Itiyoophiyaan biyyaalee ardii Afrikaa keessaa biyya adda dureedha.

Ministirri dhimma alaa Dr.Teediroos Adihaanoom akka himanitti Itiyoophiyaan Nagaafi tasgabbii Addunyaatiif kutannoodhaan waan hojjetteef sagalee Afrikaanoota hundaa argachuu dandeessee jirti.

Filatamuudhaan bu’aan argamu maalidha?

Miseensa mana maree tasgabbii dhaabbata mootummoota gamtoomanii ta’uun faayidaawwan hedduu akka qabu himama.Bu’aawwan kanneen keessaa dhaga’amtummaan Itiyoophiyaan biyyaalee Addunyaa biratti qabdu kan dabalu ta’uunsaa faayidaa adda durummaadhaan eeramudha.

Waldhabdee biyyaalee kamiyyuu keessatti mudatuuf biyyattiin ejjennoo ofii  akka qabattu,shoorri hooggantummaa ardii Afrikaa keessatti qabdu akka dabaluufi faayidaa biyyaalessaa eegsisuuf miseensa mana maree tasgabbii ta’uun shoora ol’aanaa gumaacha.

Yuuniivarstii Finfinneetti hayyuun saayinsii siyaasaafi quunnamtii idila Addunyaa gargaaraan piroofeesar Dammaqa Axxisoo FBC’tti akka himanitti miseensa mana maree tasgabbii ta’uun faayidaa kallattiifi al-kallattii qaba.

Faayidaan kallattiin argamu biyyattiin iddoo sadarkaa idila Addunyaatiin qabduufi kabajaan argattu akka dabalu taasisuun biyyaalee guddattan wajjin hojjechuuf carraan walta’uusaan hojjechuu kan uumamuufi ta’uusaati.Kuns deeggarsi Itiyoophiyaan biyyaalee guddatan irraa argattus akka dabaluuf shoora kan gumaachu ta’uusaa piroofeesar Dammaqan himaniiru.

Gama faayidaa al-kallattiitiin ammoo dhaga’amtummaan dippiloomaasii biyyattii kan dabalu ta’a jedhaniiru.

Ministeera dhimma alaattii qindeessaan mana maree tasgabbii dhaabbata mootummoota gamtoomanii ob.Tsaggaa Kibabaw gamasaaniitiin Itiyoophiyaan marsaa 3ffaan miseensa mana marichaa ta’uu danda’uunshee imala miseensa dhaabbata Daldala Addunyaa ta’uuf taasisaa jirtu kan deeggarudha jedhaniiru.

Mirri Diinoota Itiyoophiyaa akkam ta’e?

Sirni misoomawaa Demookratawaa toora Dh.D.U.O/A.D.W.U.I’tiin hoogganamu Itiyoophiyaan biyya maqaanshee busheeffamu utuu hin taane biyya maqaamshee biyyaalee Addunyaatiin lelifamu akka ta’uuf shoora gumaacheera.

Itiyoophiyaan bara sirna Hayilassillaasees ta’e sirna Darguu keessa miseensa mana maree tasgabbii ta’uun kan ammaa kana wajjin garaa garummaa ol’aanaa qaba.Yeroo Ummattoonni Itiyoophiyaa jireenya gabrummaafi hiyyummaan beekamanitti miseensa ta’uuniifi bara ijaarsi sirna Demookratawaa akka dagaagu taasifamaa jirtuttiifi qabsoon farra jireenya hiyyummaa finiinaa jirutti miseensa mana maree tasgabbii ta’uun tokko ta’uu hin danda’u.

Dhimma kana mira gartummaa dhaabbilee siyaasaafi fedhii dhuunfaa irraa bilisa ta’uudhaan ilaaluun barbaachisaadha.Maqaan biyya keenyaa Addunyaa irratti waamamuufi kabaja guddaa argachuun faayidaa siyaasaafi diinagdee ol’aanaa akka qabu hubachuun murteessaadha.

Hundumaafuu mirri diinoota Itiyoophiyaa biyya keessas ta’e biyya alaa jiraatanii injifannoo Itiyoophiyaan galmeessifte kanaan sunturraa’eera.qabbanaa’eera bishaantu itti dhangala’e jechuun ni danda’ama.

Dhiphoonni,of tultoonni,mankaraarsitoonniifi kiraa sassaabdoonni injifannoo biyyi teenya Itiyoophiyaan kaleessa goonfatte kanaan nigaddu malee nigammadu jedhamee hin eegamu.Isaan kan gammadaniifi akka malee kan fishiliqan oduun kufiinsaafi badiinsa Itiyoophiyaa mul’isu wayita dhaga’amudha.

Oromoon kana keessaa maal qaba?

Sabni Oromoo utubaa biyya kanaa akka ta’e kan haalu yoo jiraate inni gowwaadha,ykn.kan wallaalummaadhaan jaanja’edha.Ummanni Oromoo akkuma sabaafi sablammoota kanneen biroo injifannoo galmeeffame kana keessa shoora adda durummaa qaba.Hunduma keessaa ammoo kan caalu gumaacha Oromooti.

Dhiphoonni siyaasa jibbiinsaa oofaa jiran injifannoo biyyi teenya Itiyoophiyaan galmeessifte kanaan boonuu hin danda’an.Isaan kan barbaadan Itiyoophiyaan salphattee biyya kufte akka taatuufi carraa kanaanis Nafxanyaa Oromoo ta’uudhaan Ummata Oromoo jireenya gabrummaa jalatti deebisuudha.

Of tuultoonni ammoo durumaanuu Saba Oromoofi sabaafi sablammoota kanneen biroo gaqi qicuudhaan tuffatu waan ta’eef bu’aa tumsa sabaafi sbbalammoonni Itiyoophiyaa galmeessisan kanaan ni gammadu jedhamee hin eegamu.