obbo Zalaalam Jamaanah har’a mana murteetti dhiyaataniiru

Hoogganaa Biiroo Qonnaa Oromiyaa duraanii obbo Zalaalam Jamaanah har’a mana murteetti dhiyaataniiru

Shakkamticha irratti  guyyoonni qorannaa dabalataa 10 hayyamaaniiru.

Koomiishiniin Naamusaa fi Farra Malaammaltummaa Oromiyaa obbo Zalaalam Jamaanah hoggansarra wayita turanitti imaanaa mootummaa fi ummataan itti kenname dhiisuun aangoo ofiitti seeraan ala fayyadamuun malaammaltummaa akka raawwatan  shakkuudhaani, qorannaa irratti gaggeessaa kan jiru.

Har’a Naannoo Oromiyaatti manni murtii aanaa Aqaaqii dhimma isaanii ilaaluuf kan dhaddacha taa’e yammuu ta’u, koomiishinichi dhimmicha qulqulleessuuf beellama guyyoota dabalataa 14 gaafateera.

Abbaan alangee komishinichaa shakkamaai yoo gadi lakkifame humna maallaqaatiin ragaa itti dhiyaate waan balleessuu danda’uuf yakki raawwates hidhaa waggaa 10 caaluun kan adabsiisu waan ta’eef mirgi wabii akka hin kennamneef dhaddachicha gaafateera.

Torbee darbe obbo Zalaalam Jamaanah dabalatee itti aanaa kantiibaa Sulultaa duraanii obbo Diroo Damee seeraan ala lafa maqaa ofii fi firoota isaanitiin qabaachuun isaanii shakkamuun to’annoo jala oolfamuun isaanii ni yaadatama.

Dhaddachichi beellama guyyoota 14 gaafatame didee guyyoota 10 hayyamuun waxabajjii 15 bara 2008’tti akka beellame beekameera