Qabsoo FXG jechuun maal jechuudha?

Qabsoo fincila xummura gabrummaa jechuun  maal jechuudha?Ummanni Oromoo jireenya gabrummaa keessaa ba’uudhaan ofiin of bulchuu erga eegalee kunoo waggoonni 25 caalan lakkaa’amaniiru.Kan kana haalu Diina Ummata Oromoo qofaadha.Sabni Oromoo waan kanaan dura waggoota dhibbaa ol keessa jiraate sirritti beeka waan ta’eefi miidhama isarra gahaa ture irra deebi’uudhaan itti himuun hin barbaachisu.

Roorroo Saba Oromoofi sabaafi sablammoota kanneen biroo irratti roorrifamaa ture qabsoo kutannoo qabuun kan ofirraa fonqolchee gate Ummanni Oromoo ammaan booda ijoollee isaatiinis ta’e qaamolee kanneen birootiin miidhaa irra ga’u baachuu hin danda’u.

Barri mataa gadi qabatanii jiraatanis darbeera.Galanni qabsoo ijoollee Oromoofi sabaafi sab-lammootaatiif haa ta’u malee Ummanni Oromoo amma ofiin of bulchaa jira.Afaaniifi seenaasaa dagaagfachaa Nagaadhaan jiraachaa,guddina diinagdeesaa dabaluuf carraaqqii ol’aanaa taasisaa jira.

Qaawwa kiraa sassabdoonni muraafni uumaniin barana fincilaaf kan ka’e ummanni godinaalee gara garaa qonnaan bulaan,Dargaggoonniiffi jiraattoonni Magaalaa fedhiin isaanii rakkoon dameewwan adda addaatiin mudataniin fala akka argataniifidha malee sirna bulchiinsa mootummaa ammaa kana jibbuun miti,kanas qabsuma isaaniitiin mirkaneessaniiru.

Utuu Ummanni Oromoo sirna misoomaawaa demookraatawaa kana hin barbaadu ta’eefi irratti fedhii hin qabu ta’ee  ofirraa fonqolchuudhaaf qabsoo inni taasisu dura dhaabbachuu kan danda’u qaamni tokkollee akka hin jirre hubatamuu qaba.

Ummanni rakkoonsaa akka fala argatuuf kaka’uumsa taasise kana da’oo kan taasifatan humnoonni badii Ummata Oromoo gabrummaatti deebisuu barbaadan ammoo waan biraa jechaa akka jiran beekamaadha.Fincila xummura gabrummaa galmaan geenyu malee duubatti deebi’uun hin jiru jechuun kan dhaadatanis jiru.Garuu dhaadannoon isaanii kun Ummata bal’aa Oromootiin kan deeggarame miti.Oromoon Nagaa barbaada,Naqaa qaama biraas jeequu hin barbaadu.

Sabni Oromoo man’ee shoroorkeessistootaa ta’uufis iddoo hin qabu.Kan maqaa isaatiin daldalaa garaa isaanii guuttatan eenyufa’i akka ta’anis sirritti beeka,kanaaf wayita ammaa kana Ummanni Oromoo qaama faayidaafi mirga isaa sarbuufi sarbisiisuuf deemuu hin fedhu,fagootti ofirraa qolata.kan dhiyeenya qabatamaan mul’ises kanuma akka ta’e beekamuu qaba.

Alaabaa ABO iddoo adda addaatti mirmirsuuniifi ijoollee Oromoo maallaqaan mooqsuudhaan kiliippii sirba waraanaa sirbisiisuun jijjiiramni fidu tokkollee hin jiru.Qaamonni kallattiidhaan kanaan fayyadamaa jiran eessa akka jiraatan,akkamitti akka jiraachaa jiran Sabni Oromoo sirritti beeka.kanaaf turjumaana hin fedhu.

Kanneen Oromoo gabrummaa keessaa baafna jechuu dhaadataniifi akka malee wixifachaa jiran ofumaanuu gabrummaafi ergamtummaa jala jiru waan ta’eef kana jalaa of baasuuf utuu carraaqanii wayyaaf.Maqaa Saba Oromoo waamuudhaan fedhii dhuunfaa guuttachuuf kaachuun eessumaanuu akka nama hin geenya sochii darbe irraa hubachuun barbaachisaadha.

Ummanni Oromoo amma dhaabbata qabsoo isaa kallattii sirriidhaan hoogganuuf tokkicha qaba.Innis Dhaabbata Demookraatwa Ummata Oromooti.Utuu Dhaabni kun lubbuudhaan jiruu Sabni Oromoo qaama kamiiniyyuu burjaajeeffamee gabrummaa kanaan dura dugdasaa madeesse jalatti deebi’ee hin galu.Nafxanyaa Amaaraa barbadeessee awwaaleera.

Nafxanyaa Oromoo isuma keessaa ba’aniin gabroomuu hin barbaadu.Oromoon saba goota ta’edha.Oromoon irkoofi utubaa biyya Itiyoophiyaa jedhamtu kanaa akka ta’es hubatamuu qaba.kan kana wallaale seenaa  haa qoratu,haala qabatamaa amma jirus haa xiinxalu.kanaan achitti xummura fincila gabrummaa jechuun wixiffachuun gatii tokkollee hin qaba.