Jajjabee Loomii Badhoo waan jedhan….

 

Adda Loomii Badhoo sadarkaa hooggansaa gara garaa irratti Mootummaa Naannoo Oromiyaa tajaajilaniiru.Hooggansa waajjiraalee gara garaa irraa eegalee Af-yaa’ii Caffee Oromiyaa ta’uudhaan tajaajilaa turan.Wayita ammaa itti aantuu af-yaa’ii mana marii bakka bu’oota ummataa ta’uudhaan biyya isaanii Itiyoophiyaa tajaajilaa jiru.

Jajjabeen tun haala yeroo Naannoo Oromiyaafi biyyaa irratti xiyyeeffachuudhaan OBN wajjin turtii taasisaniiru.Dhimmoonni isaan kaasan Oromiyaafis ta’e biyyaaf kan tolu waan ta’eef dhimmoota gurguddoo tokko tokko irratti iftooma uumuuf waan itti aantuun af-yaa’ii mana marii bakka ba’uuta ummataa kabajamtuu addee Loomii Badhoo OBN’itti himan isin hordoftoonnikoo barreeffamaan hanga tokko odeeffannoo akka qabaattaniifin isiniif dhiyeesse,dubbisaa!

Miseensoota mana marii bakka bu’oota ummataa 547 keessaa bakka bu’oonni Naannoo Oromiyaa lakkoofsaan 179 haala yeroo irratti mari’achuudhaan  dhimma nagaa Oromiyaafi Finfinnee irratti ejjennoo akka qabataniifi ejjennoon miseensoonni mana marii bakka bu’ootaa mari’achuudhaan qabatan kunis Oromiyaafi biyya kan fayyadu,gara fuulduraattis kan tarkaanfachiisu akka ta’e adde Loomiin mirkaneessaniiru.

‘Oromiyaan mataa Itiyoophiyaati’jedhan adde Loomiin.Dhuguma,haqa himan.Humnoonni biyya keessaafi alaa Itiyoophiyaan akka bittinnooftuuf kutannoodhaan hojjechaa jiran Nagaan Oromiyaa yoo boora’e Itiyoophiyaa diiguun salphaa akka ta’e amanuudhaan waan danda’an hunda raawwachaa jiru.

Kanaanis beekaafi wallaalaa Oromootti fayyadamuudhaan Nagaan Oromiyaa akka boora’uuf Ummanni Oromoo nagaan ba’ee nagaan galuu akka hindandeenye taasisaa jiru.

Haalli kun hatattamaan dhaabbachuu qaba jechuun miseensoonni mana marii bakka bu’oota ummataa ijjennoo cimaa qabataniiru.Gareewwan humnoota adda addaa biyya diiguuf socho’aa jiraniif hojjetan gocha badii raawwatan akka dhaabaniif haalli mijaa’aan jira kan jedhan adde Loomii Badhoo rakkoon nagaa uumame mariidhaan fala waaraa akka argachuu danda’uuf mootummaan Itiyoophiyaa qophaa’ummaa gahaa waan qabuuf carraa kanatti fayyadamuun barbaachisaa akka ta’e dhaaman.

Finxaaleeyyiin Saba Oromoo keessaa ba’anis ta’an finxaaleeyyiin saba biraa keessaa ba’an Ummata Oromoo irratti miidhaa akka hin geessifneef hojjetamuu qaba.Sabni Oromoo jijjiiramni akka dhugoomuuf qabsoo cimaa kan taasise deebi’ee miidhamaaf saaxilamuuf miti.

Waggoota jijjiiramaa muraasa darban keessatti Oromoon akka sabaatti waan fayyadameefi waan ittiin miidhames akka qabu kan dubbatan itti aantuu af-yaa’ii Loomii Badhoo miidhaan Oromoos ta’e sabaafi sab-lammoota kanneen biroorra finxaaleeyyiidhaan gahaa jiru akka dhaabbatuuf kutannoodhaan hojjechuun dhimma murteessaa akka ta’e amanuun hojjetamaa akka jiru mirkaneessan.

Humnoonni biyya diguuf socho’aa jiran’Oromoon biyya bulchuu hindanda’u,biyyaa mitii Naannoo isaaniituu bulchuu hindandeenye’ ergaa jedhu dabarsuuf itti qophaa’uudhaan socho’aa akka jiran hubachuun barbaachisaa akka ta’es himan.Isa kanaaf ammoo ajandaa adda addaa uumuudhaan shakkiin akka uumamu taasisaniiru.’Abbaa dabaree’ jedhanii moggaasuudhaan Oromoo irratti shakkiin akka uumamuuf fagoo akka deemaniifi kunis sochii humnoonni tokko tokko nagaa booressuuf taasisaa jiran keessatti shoora kan gumaache akka ta’e himan.

Dhimma Finfinnee wajjin walqabatee hooggansa Finfinnee waamuudhaan hookkara tibbanaa irratti miseensoonni mana marii bakka bu’oota ummataa akka mari’ataniifi gaaffiin Finfinnee irratti jiru mariifi karaa seera qabeessa ta’een fala waaraa akka argatuuf kallattiin akka kaa’ame itti aantuun af-yaa’ii mana marii bakka ba’oota ummataa kabajamtuu addee Loomoo Badhoo himaniiru.Sabni Oromoo hooggansa isaaf yaadu kan quuqamaan isaaf hojjetu hedduu qaba.Adde Loomii Badhoo dabalatee ijoolleen Oromoo saba Oromoo keessaa ba’an Oromiyaan utubaa Itiyoophiyaa akka taate hubachuudhaan hojjechaa jiru.

Oromoon akkuma dur taasisaa ture har’as waan hedduudhaan bu’uura tokkommaa Itiyoophiyaati.Handhuura biyya guddoo Itiyoophiyaat.Bu’uurri yoo socho’e gaarii hinta’u.Diinni biyya diiguuf kaayyeeffate dhugaa kana waan beekuuf Hadhuura biyyaa Oromiyaa irratti xiyyeeffate.Oromoo dammaqi! Beekaan Oromoo ka’i,wallaalaa barsiisi.kan hin hubanne hubachiisi.Walhubannee yoo socho’uu dandeenye wanti nuti moo’achuu hindandeenye tokkollee hinjiru.Fayyaa ta’aa!